DILI, STLTIMORLESTE.com – Aniversariu konsulta popular 30 Agostu 1999 ba dala 26, laos deit atu selebra, maibe momentu importante ida nee fo minutu balun hodi reflete eroi sira nia sakrifisiu neebe fakar raan hodi hetan independensia.
Arsebispu Arkedioseze Metropolitana Dili, Dom Virgilio Cardeal do Carmo da Silva, SDB hatete, ohin dader sarani barak iha Katedral hodi hasae sinal agradesimentu ida nee ba aniversariu konsulta popular ba dala 26.
“Hakarak konvida Timoroan tomak, ohin nee atu ita laos deit selebra maibe hakmatek minutu oan ida hodi hanoin ema neebe terus ba hirak neebé mate ba kauza konsulta popular ninian, mate, fakar sira nia raan hodi hametin liu tan neebe ita hili liberdade, ita nia independensia, ita agradese tanba iha momentu determinante tebes hatudu katak Timoroan idak-idak importante kontribui, ema hotu-hotu nia votu mak sai ita nia auto determinasaun ukun aan,” hatete Arsebispu Arkedioseze Metropolitana Dili, Dom Virgilio Cardeal do Carmo da Silva, SDB ba jornalista sira iha Aeroportu Internasional Nicolau Lobato, Komoro, Sabadu (30/08/2025).
Dom Virgilio hatete, orgulhu ba Timoroan sira hotu, tanba iha loron konsulta popular ida nee mak sai marka ida hodi mundu rekonhese.
Konvite ida ba Timoroan hotu liu-liu joven sira atu lori dezenvolvimentu, lori paz kontinua espiritu konsulta popular ba dala 26 nee katak, Timoroan idak-idak nia kontribuisaun nee importante, kiik, beik matenek, katuas ferik hamutuk bele dezenvolve rai ida nee. Ida nee konsulta popular fo mensajen ba ema idak-idak katak ema ida labele, maibe hamutuk iha forsa, hamutuk bele hodi dezenvolve rai ida nee.
Savi Konsulta popular ema idak-idak ba forma lina naruk atu tuu husi votus kiik boot hotu-hotu nia lian sira nee mak ikus mai fo sai mundu katak TL ukun aan, tanba nee unidade nee hahú laos husi deit kiik sira, maibe boot sira hotu-hotu kreda nia ulun nomos ba too iha politiku no governante sira.
Jornalista: Joaninha Belo
Editora: Domingas Gomes
