DILI, STLTIMORLESTE.com – Ministrriu Edukasaun (ME) liu husi Diresaun Ensinu Sekundariu Jeral hadia problema infraestrutura eskola sekundariu fazeadamente.
Asuntu nee hatoo husi Diretor Nasional Ensinu Sekundariu iha ME, Benjamin Gomes da Cruz Fernandes ba STL, Kuarta (03/09/2025).
Nia dehan, edifisiu hirak neebe mak hanesan Eskola FINANTIL nee agora tama ona iha planu, para halo konstrusaun foun. Ba Eskola Sekundariu nu. 4 Setembru nee tama iha mega projetu, nee atu halo eskola referensia.
“Ita nia eskola sekundariu jeral nee bazeia ba nesesidade neebe mak iha, katak bainhira nesesidade too ami sei hadia, tanba ita hadia fazeadamente, laos atu hadia dala ida deit, lae,” nia informa.
Nia dehan, kona-ba problema infraestrutura iha ensinu sekundariu jeral nian nee presiza rezolve fazeadamente, maibe balun hadia daudaun ona no balun ba oin Ministériu nafatin hadia fazeadamente.
Nunee mos Diretor Eskola Sekundariu Jeral FINANTIL, Aniceto Berlelo hatete, hein katak ho konstrusaun ba sira nian eskola nee, bele apoiu ona sira nian sala de aprendizajen ba estudantes sira. Nee duni sira hein deit, tanba tinan oin bele halo ona konstrusaun foun ba sira nian eskola ida nee.
Jornalista: Jacinta Sequeira
Editora: Domingas Gomes
