DILI, STLTIMORLESTE.com — Jurista Sérgio Dias Quintas kritika konflitu interese entre juízes no nomeasaun Juiz Administradór ne’ebé nia konsidera kontra regra.
Quintas hateten katak, servisu tribunál hatudu sinal negativu, tanba konflitu interese barak mosu entre juízes, ne’ebé bele afeta sira-nia kumprimentu dever.
“Hau hare agora servisu Tribunal nee hatudu sinal negativu ida ba ita agora dadaun, tanba ita hare Juiz sira nee forma sira nia kapasidade atu servisu deit, maibe soke agora nee konflitu interese maka barak mosu iha Juiz sira entaun Juiz sira mos la kumpri sira nia dever lolos,” dehan jurista Sérgio Dias Quintas ba STL iha Kaikoli, Kuarta (14/10/2026).
Nia esplika katak, nomeasaun Juiz Administradór tenke tuir regra, inklui konsiderasaun ba kategoria juízes klase primeiru ka segundu.
“Juiz sira iha Tribunal Dili nee sira neebe ho segunda klasse iha, tanba saida maka la nomei Juiz segunda klasse sai Juiz Administrador.” dehan nia.
Quintas husu tan razaun Konselu Superior Majistradu Judisial (KSMJ) nian atu nomeia juiz klase terseiru ba pozisaun Juiz Administradór, ne’ebé nia konsidera kontra regra.
“Wainhira Juiz Administradór neebe nia pozisaun kontra ona regra, se nia hasai instrusaun ruma, fiar katak Juiz seluk sei halo opozisaun balu ba nia desizaun,” dehan Quintas.
Nia mós refere ba juízes na’in haat ne’ebé KSMJ deside transfere ba munisípiu sira. Juízes hirak-ne’e aprezenta ona reklamasaun no impugnasaun hasoru desizaun transferénsia.
“Sira halo ona impugnasaun, sira nia reklamasaun nee iha efeitu suspensivu, bele suspende lai sira nia transferensia nee, taba sira sei halo reklamasaun,” dehan Quintas.
Nia hatutan katak, juízes hirak-ne’e tenke kontinua hala’o knaar iha Tribunál Dili to’o iha desizaun kona-ba sira-nia rekursu.
Iha sorin seluk, akadémiku Universidade Nasionál Timor Lorosa’e (UNTL), Rafael de Jesus, subliña katak desizaun KSMJ tenke tuir lei atu evita dúvida iha autoridade judisiária.
“Desizaun neebe foti tenke tuir regra neebe iha, atu labele hamosu duvidas iha autori judisiariu sira,” dehan Rafael de Jesus.
Nia enfatiza katak juízes iha papél importante iha sistema justisa, tanba ne’e, desizaun kona-ba sira tenke tuir lei.
(ter)
