DILI, STLTIMORLESTE.com — Desizaun Konsellu Superior Majistradu Judisiál (KSMJ) atu transfere juiz na’in haat (4) husi Tribunál Dili ba munisípiu seluk hamosu preokupasaun no protestu.
Juiz na’in haat ne’ebé hetan desizaun transferénsia mak Juíza Ana Paula Fonseca ba Tribunál Oe-Cusse, Juiz António Fonseca no Juiz José Gonçalves ba Tribunál Suai, no Juíza Fransisca Cabral ba Tribunál Baucau.
Tuir observasaun STL nian iha Tribunál Dili, desizaun transferénsia ne’e hamosu preokupasaun no reasaun protesu husi juiz balu ne’ebé la konkorda ho desizaun refere.
Protestu hirak-ne’e dirije ba Juiz Administradór Tribunál Dili, maski desizaun transferénsia ne’e mai husi deliberasaun KSMJ.
Informasaun ne’ebé disponivel hatudu katak juiz na’in haat ne’ebé hetan transferénsia hatama ona reklamasaun ba KSMJ antes ne’e.
Tanba reklamasaun ne’e, juiz hirak-ne’e kontinua hala’o sira-nia knaar iha Tribunál Judisiál Primeira Instánsia Dili, enkuantu hein KSMJ nia desizaun kona-ba reklamasaun ne’ebé hatama ona.
Tuir informasaun ne’ebé disponivel, transferénsia sei hala’o bainhira iha desizaun ne’ebé permite prosesu ne’e kontinua.
(ter)
