KELIKAI ANTIGU, STLTIMORLESTE.com – Gabinete Prezidente Republika (PR) apoiu fasilidade eskola no ekipamentu desportu ba Eskola Ensinu Baziku Filial Dom Carlos Filipe Ximenes Belo Darefana Primeiru Segundu no Terseiru Siklu iha Suku Namanei, Postu Kelikai Antigu, Munisipiu Baukau.
Asesor Fraternidade Umana, Nuno Horta hateten, atividade apoiu ekipamentu no fasilidade ba eskola EBF Dom Carlos Filipe Ximenes Belo, tanba Gabinete PR simu proposta husi eskola refere neebe durante nee menus meza kadeira ba estudante sira, nunee PR tetu proposta husi eskola refere no iha loron 03 Setembru nee transporta ekipamentus no fasilidade eskola ba eskola refere.
“Ita bele hatene eskola ida nee area rural prezisa tebes apoiu, nunee Prezidente Republika foti inisiativa fo apoiu ba sira nia atividade neebe sira atu halo,” hateten Nuno Horta ba jornalista sira, hafoin simbolika entrega ekipamentu no fasilidade ba eskola EBF Dom Carlos Filipe Ximenes Belo, iha Baukau, Kuarta (03/09/2025).
Nia dehan, fasilidade eskola no ekipamentus desportu neebe PR liu husi Gabinete fo apoiu ba eskola refere mak hanesan kuadru aprendizajem unidade 6, komputador marka hp 1 no printer marka hp 1, meza ba estudante unidade 100 no kadeira ba estudante unidade 100 neebe objetivu atu fasilita estudante sira iha prosesu aprendizajen, tanba durante nee eskola refere menus fasilidade hanesan meza kadeira ba prosesu aprendizajen nian.
Enkuantu kona-ba apoiu ekipamentus desportu nian hanesan bola futebol, volibol, kamizola no seluk PR hetan tulun husi nia maluk Franklin hodi apoiu tutan ba eskola no jovem sira neebe prezisa. Tanba nee husu eskola refere atu kuidadu fasilidade sira hanesan meza kadeira no seluk tan nunee bele uza ba tempu naruk.
Iha fatin hanesan Diretor Eskola Izido Gusmão agradese ba apoiu nee no prontu atu kuida hodi utiliza ba tinan naruk, tanba durante tinan naruk eskola infrenta problema meza kadeira.
“Em nome da eskola hau kontente tebes, tanba durante nee ami nia eskola frazil tebes ba buat hotu-hotu, liu-liu mak meza kadeira sira nee, maibe ohin loron meza kadeira too ami nia fatin ami sei kuida hodi uza ba longu prazu nian,” katak Izido.
Enkuantu estudante Lizia Arlindo Soares sente kontente ho apoiu refere, tanba durante nee menus meza kadeira hodi difikulta estudante sira, tanba estudante nain 2 okupa meza kadeira ida.
“Ami agradese barak ba Prezidente Republika, tanba buat neebe ami laiha ami nia Prezidente bele mai ajuda ami,” Lizia espresa
Entertantu total estudante neebe benefisiariu ba apoiu refere hamutuk nain 256 kompostu Primeiru Segundu no Terseiru Siklu ho total profesores nain 8.
Jornalista: Tomas Reis
Editora: Carme Ximenes
