DILI, STLTIMORLESTE.com – Prezidente Republika (PR), Jose Ramos Horta simu vizita husi Koordenador Rezidente ONU iha Timor Leste, Funmi Balagon hodi diskute hamutuk oinsa hametin kooperasaun UN ho Governu Timor Leste (TL).
Bainhira remata hasoru malu Koordenador Rezidente ONU iha Timor Leste, Funmi Balagon ba jornalista sira, ha palasiu Prezidensial, Nicolau Lobato, Bairo Pite, Kuarta (03/09/2025) hatete, ohin mai halo enkontru ho Prezidente Republika, Jose Ramos Horta diskute kona-ba programa no planu kooperasaun Nasaun Unidas nian ba Governu Timor-Leste iha area agrikultura foku liu ba iha sistema alimentar kona-ba produsaun, distribuisaun, no mos lojistiku kona-ba ai-haan nian.
Koordenador Rezidente UN iha Timor Leste hatete, iha enkontru nee koalia mos kona-ba preparasaun asembleia jeral UN nian neebe sei akontese iha fulan Setembru.
“Objetivu enkontru ohin nee atu koalia ho Prezidente Republika kona-ba programa, planu kooperasaun UN nian ho ita nia governu. Kooperasaun iha area agrikultura foku liu ba iha sistema alimentar kona-ba produsaun, distribuisaun, no mos lojistiku kona-ba ai-han nian, nunee mos nutrisaun en-jeral ida nee hanesan aspetu neebe importante tebes ba nasaun ida, ai-han hanesan ida neebe ita hotu hatene importante,” dehan Funmi.
Funmi dehan, apoiu neebe fo ba estadu, laos liu husi projetu sira neebe neste momentu implementa hela, maibe fo mos liu husi apoiu tekniku. Hanesan UN staff neebe durante nee halo ona servisu neebe diak tebes iha kampu, apoiu ba iha setor agrikultura nian, ida nee mak UN haree ba oin atu koopera no kolabora diak liu tan, oinsa mak maksmiza kooperasaun servisu ho governu.
Iha biban nee Prezidente Republika, Jose Ramos Horta hatoo bemvindu ba Koordenador Rezidente ONU iha Timor Leste, Funmi Balagon neebe mai palasiu hodi hasoru malu ho Xefe Estadu hodi deskute koperasaun Un ho Tl.
Prezidente Republika hatoo reasaun pozitivu tebes, nia simu UN hanesan baibain ho kooperasaun neebe diak, nia mos fo nia opiniaun no estetmentu kona-ba kolaborasaun neebe sei halo ba oin ho UN.
Aleinde nee, Prezidente Republika mos reforsa liu tan katak Timor ho UN sei iha kooperasaun diak liu tan iha area oin oin iha futuru.
Jornalista: Emerenciana Pinto
Editora: Carme Ximenes
