DILI, STLTIMORLESTE.com – Ministeriu Edukasaun (ME) realiza konferensia nasional ba dala 2, kona-ba Edukasaun Infansia ho nia tema “Investe iha Edukasaun Infansia Ohin ba Futuru Neebe mak Naroman liu”.
“Ohin ita hasoru malu ho konferensia nasional daruak kona-ba edukasaun labarik, konferensia dahuluk neebe halao iha tinan sanulu liu ba asina ona enkuadramentu ida iha dezenvolvimentu sistema edukasaun pre-eskolar iha Timor Leste,” dehan Ministra Edukasaun, Dulce de Jesus ba jornalista sira liu husi nia diskursu iha salaun Oka, Kinta (04/05/2025).
Ministra Edukasaun (ME), Dulce de Jesus hateten, edukasaun infansia laos privilejiu ida, maibe nee direitu ida, no reprezenta pasu dahuluk ba harii sosiedade ida neebe ekuitativu, inkluzivu no prosperu.
“Ohin loron ita halibur hamutuk laos deit atu hanoin kona-ba ita nia progresu, maibe atu renova ita nia kompromisu, aprende husi ita nia esperiensia no lao tuir dalan neebe klaru ba dekada oin mai atu harii sosiedade ida neebe mak ekitativu no prosperu,” katak Dulce.
Dulce dehan, Politika Nasional Edukasaun Pre-eskolar neebe esplika prioridade estratejika lima, inklui habelar asesu ba pre-eskolar mak hanesan:
Formasaun ba profesor sira, dezenvolvimentu kurikulu, haforsa envolvimentu inan-aman, komunidade no promove pratika edukasaun inkluziva sira. Hasae konsiensia no komprensaun entre parte interesada sira hotu kona-ba importansia krusil edukasaun infansia nian.
Hadia kualidade edukasaun infansia, hodi garante katak labarik sira dezenvolve abilidade solidu kona-ba literasia no numerasia molok tama iha eskola primaria. Hametin kolaborasaun iha nivel nasional, munisipiu no komunidade, hodi haburas aprosimasaun koordenada no olistika hodi implementa programa edukasaun infnsia nian.
Promove troka konhesimentu no pratika diak liu, hodi permite ema sira neebe halo politika, pratikante sira, no komunidade sira atu aprende husu malu no esperiensia global sira.
Misaun aumenta konhesimentu kona-ba politika no pratika sira ensinu nian neebe efetivu, no define pasu sira tuir mai hodi dezenvolve roteiru nasional ida ba Edukasaun Infansia.
vizaun, realidade, iha neebe labarik hotu-hotu iha Timor Leste asesu ba edukasaun pre-eskolar ho kualidade aas, ambiente aprendizajen neebe seguru no estimulante, no oportunidade atu alkansa sira nia potensial tomak.
Tuir observasaun jornalista STL iha terenu katak, segundu konferensia nasional nee realiza hahu husi loron 4-5 no hetan partisipasaun masimu husi Prezidente Republika (PR) Jose Ramos Horta, diretores munisipiu inklui Prezidente Autoridade Munisipiu sira.
Jornalista: EST 1
Editor: Xisto Mendonça
