DILI, STLTIMORLESTE.com – Reitor Universidade Catolika Timorense (UCT), Padre Joel Casmiro relata atividade universidade nian ba Prezidente Republika (PR), Jose Ramos Horta neebe nuudar konselheiru UCT.
Bainhira remata hasoru malu, Reitor UCT, Padre Joel Casmiro, ba jornalista sira, iha Palasiu Prezidensial, Nicolau Lobato, Bairo Pite, Sesta (5/09/2025) hatete, mai hasoru Prezidente Republika nuudar konsilheiru UCT nian, tanba nee mai relata informasaun no lalaok neebe iha UCT ba Xefe Estadu.
“Ohin hau ho Doutor Cancio mai iha palasiu hasoru malu ho Prezidente Republika ho onjetivu ida premeiru ami hakarak informa deit ba sua exelensia kona-ba lalaok neebe ami halao iha Universidade Katolika, iha momentu sua exelensia mos hanesan ida neebe fo opinaun no konseleiru ba Universidade tanba nee ami iha obrigasaun ida atu hatoo mos informasaun universidade nian, depois troka idea ruma oinsa lalaok ba futuru nia dezenvolve relasaun externa ka relasaun internasional sira ho universidade seluk ho nia objetivu, oinsa hasae diak liu tan kualidade ita nia universidade sira iha rai laran liu liu ida neebe ami halao hela knaar iha universidade Katolika,” dehan Reitor UCT nee.
Nia hatutan, hasoru malu ho Prezidente Republika hodi fo hanoin ba malu, oinsa bele hasae kualidade Universidade iha rai laran, liu liu universidade Catolika Timorense neebe oras nee sira haknaar aan ba.
Iha biban nee Reitor mos informa ba Prezidente Republika kona-ba rejultadu Ana no asesor Internasionais sira, neebe halo akreditasaun diak ba Universidade Catolika Timorense.
“Ami imnorma kona-ba akreditasaun universidade ninian neebe hetan husi Ajensia Nasional (ANA) ba akreditasaun, Asesot internasionais nomos nasional sira neebe ho akreditasaun diak ba UCT,” katak Padre.
Aleinde nee informa mos ba Prezidente Republika Jose Ramos Horta kona-ba atividade neebe mak estudante husi UCT halo liu-liu estudante husi Medicina neebe halao atividade iha Jakarta Indonezia, inklui mos atividade seluk.
“No imformasaun seluk konaba estudante sira iha neeba atividade sira neebe ami halao ezemplu medicina nia atividade ba iha Indonezia, Jakarta, nomos iha atividade seluk neebe ami imforma ba Prezidente Republika,” katak Padre Joel.
Iha biban nee Prezidente Republika, Jose Ramos Horta hatoo bemvindu ba Reitor nomos Cancio Freitas neebe bele hasoru malu ho Prezidente Republika hodi relata atividade universidade nia, no oinsa bele fo hanoin ba malu hodi bele hadia diak liu tan kualidade Universidade nia, nunee bele transforma ba estudante sira ho kualidade, nunee estudante sira bainhira remata husi Universidade bele hetan bukae neebe diak hodi transforma tutan ba sosiedade.
No mensajen neebe babain Prezidente Republika sempre hatoo ba estudante sira, mak estuda estuda estuda tanba futuru nasaun iha joven sira nia liman.
Jornalista: Emerenciana Pinto
Editora: Carme Ximenes
