DILI, STLTIMORLESTE.com – Ministeriu Edukasaun (ME) asina Memorandun of Understanding (MoU) ho UN Women, atu halao atividades formasaun hodi hakbit ekonomia alin feto sira nian iha Munisipiu Lautem no RAEOA.
Tuir Diretora Jeral Planu Politika, Inkluzaun no Informatika, Odilia das Dores Ung Martins dehan, kooperasaun entre ME ho UN Women laos foin primeiru vez, maibe koperasaun ida nee ninia tempu mak remata ona, tanba nee presiza extende fali.
“Iha oportunidade ida nee hau atu fo hatene ba ita nian komunidade sira hotu katak, ohin ita asina ona MoU ba ita nian koperasaun servisu entre ME ho UN Women. Hau hanoin UN Women laos foin primeira vez servisu hamutuk ho ME, maibe ami nian koperasaun ida nee, ninia tempu mak remata ona,entaun ami presiza extende fali ami nian koperasaun ida nee,” dehan nia ba jornalista iha sala VIP ME, Vila Verde, Kuarta (10/09/2025).
Nia dehan, asina MoU ida nee atu halao atividades foun sira, liu-liu formasaun sira neebe mak atu hakbit ekonomia alin feto sira nian iha Munisipiu rua, neebe mak sai hanesan targetu pilotajen iha Munisipiu Lautem no RAEOA. Formasaun ida nee atu responde ba deklarasaun, neebe iha nee ba hatur ona katak, oinsa atu bele haforsa ekonomia feto, atu la dependensia ba se deit.
“Sira Forsa atu halao sira nian moris ho skill neebe sira iha, atu bele hahu servisu kiik oan. Ida neebe mak bele fo rendimentu ba sira, tanba ida nee mak ita hanoin katak, formasaun sira neebe mak hetan suporta husi finansiamentu no suporta liu husi UN Women hodi servisu hamutuk ho ME, atu haree ba formasaun sira neebe mak targetu ona ba iha tinan ida nee, no tinan oin atu bele halao,” nia esplika.
Nia hatutan, atividades nee rasik tarjetu ba estudantes sira 100 pesoas, neebe identifika 80 nee husi feto 60 no 20 nee husi mane. Sira neebe mak identifika estudantes sira nee mai husi sira neebe agora halao hela programa iha ensinu rekorenti ninia, nomos sira neebe mak iha.
Nia afirma, atividades formasaun ida nee agora dadaun halo ona primeira faze ninia formasaun ba treinador sira. Identifika profesores 20,10 mai husi Lautem no 10 mai husi RAEOA.
Sira halao ona formasaun iha semana rua nian laran, no horseik entrega ona sertifikadu ba sira. Neebe agora sira tenke fila fali ba Munisipiu, atu nunee prepara no semana oin mai komesa ona formasaun ba estudantes no identifikasaun pesoal sira neebe ohin mensiona seim pessoas neebe halo dala ida deit iha Lautem no RAEOA iha dia 16 Setembru nee.
Jornalista: Jacinta Sequeira
Editora: Domingas Gomes
