DILI, STLTIMORLESTE.com – Prezidente Komité Paralímpiku Nasionál Timor-Leste (CPNTL), Mateus Lucas afirma katak, atleta paralímpiku Timor-Leste prepara an ho máximu atu partisipa iha Aichi-Nagoya 2026 Asian Para Games, ne’ebé sei realiza iha Japãun, husi 18 to’o 24 Outubru 2026.
Mateus Lucas hateten katak, CPNTL garante preparasaun atleta sira, maibé la bele promete rezultadu, tanba kondisaun kompetisaun no situasaun iha kampu bele muda iha tempu saida de’it.
“Hanesa lideransa iha CPNTL, ami garante katak atleta sira bele halo buat ruma. Maibé ami labele promete rezultadu; ita tenke haree rezultadu iha kampu laran. Durante treinamentu, klima iha ita-nia rai no iha Japãun la hanesan, no situasaun bele muda iha tempu saida de’it. Ami garante katak prepara atleta sira ho máximu,” Mateus Lucas hateten ba jornalista STL, iha nia servisu-fatin, Federação CPNTL, iha KONI Dili, Kuarta-feira, 14 Outubru 2026.
Atleta paralímpiku na’in-haat husi Timor-Leste sei reprezenta nasaun iha kompetisaun desportu internasionál ne’e, ne’ebé halibur atleta ho defisiénsia husi nasaun sira iha Ázia.
Atleta na’in-haat ne’e kompostu husi mane na’in-tolu iha modalidade para-atletizmu no feto na’in-ida iha modalidade para-ténis-meza.
Atleta sira ne’ebé sei reprezenta Timor-Leste mak Teófilo Freitas, Joãozinho Fernandes Araújo no Romeiro de Deus, iha modalidade para-atletizmu, no Abelita Borges, iha modalidade para-ténis-meza.
Partisipasaun atleta na’in-haat ne’e sai oportunidade ida ba Timor-Leste atu hatudu kapasidade atleta paralímpiku sira iha nivel internasionál, maski sei hasoru dezafiu tanba diferensa klima no kondisaun kompetisaun iha Japaun.
(leo)
