DILI, STLTIMORLESTE.com – Primeiru Ministru (PM), Kay Rala Xanana Gusmão rekonhese servisu neebe diplomata no polítiku, Zacarias Albano da Costa halao durante mandatu tinan 4, nuudar Sekretariu Ezekutivu iha Komunidade sira lian Português (CPLP) nian.
“Primeiru Ministru rekonhese servisu neebe mak hau halo iha mandatu nuudar Sekretariu Ezekutivu CPLP nian durante tinan 4. Primeiru Ministru hein katak hau bele fo hau nia kontribuisaun iha dezenvolvimentu rai nee ba oin,” hatete Zacarias Albano ba jornalista sira, hafoin enkontru ho Primeiru Ministru, iha Palasiu Governu, Kuarta (10/09/2025).
Durante enkontru ho Xefe Governu, Zacarias Albano atualiza kona-ba mandatu neebe remata ona nuudar Sekretariu Ezekutivu no aproveita mos diskute kona-ba situasaun Jeral iha CPLP.
“Hau mai koalia ho Primeiru Ministru laos kona-ba CPLP deit, maibe mos kona-ba problema sira neebe nasaun nee enfrenta oinsa hau mos bele fo kontribuisaun atu hadia rai nee b oin,” nia esplika.
Entretantu iha fulan Agostu 2021, Zacarias Albano simu pose nuudar Sekretariu Ezekutivu CPLP nian ba periodu hahu husi loron 1 fulan-Agostu tinan 2021 too loron 31 fulan-Julhu tinan 2023, hafoin halao ona mandatu da-ruak entre tinan 2023 no 2025.
Jornalista: Alberto Menezes
Editora:Carme Ximenes
