BAUKAU, STLTIMORLESTE.com – Diresaun Servisu Ministeriu Solidariedade Sosial no Inkluzaun (MSSI) Munisipiu Baukau halao ona kontaktu ba Autoridade Suku Laisorulai de Cima, atu identifika kondisaun moris Julião da Costa idade 13 ho nia familia sira, iha Postu Administrativu Matebian, Munisipiu Baukau.
Xefe Suku Laisorulai de Cima, Cipriano Belo hatete, familia Agostinho Fraga Fernandes nia membru familia sira hanesan oan Julião da Costa idade 13 no seluk tan neebe sai husi eskola no balu la idade too ona atu eskola, maibe la eskola, tanba kondisaun ekonomia familia Diresaun Servisu Ministeriu Solidariedade Sosial no Inkluzaun Munisipiu Baukau halo ona kontaktu ho Autoridade Suku atu apoiu famiiia nee.
“Ami hetan ona kontaktu husi MSSI Baukau kona-ba ajudasaun, maibe apoiu nesesidade bazika deit ga apoiu tan buat seluk hau seidauk hatene,” hateten Cipriano ba jornalista STL liu husi telefone, Kuarta (10/09/2025).
Maibe kona-ba apoiu husi MSSI neebe planeia nia parte seidauk hatene loos, mas diak liu apoiu mos material konstrusaun uma nian no finanseiru balu, nunee labarik sira bele asesu fali eskola.
Xefe Suku nee husu MSSI apoiu material konstrusaun uma nian ba familia nee, tanba uma hela fatin mos kondisaun la seguru neebe kauza mos husi familia nee menus rendimentu atu konstrui hikas uma dignu.
“Apoiu nesesidade bazika nee la kleur ida entuan presiza material ruma para sira bele hadia sira nia uma apoiu orsamentu oituan, tanba ekonomia uma laran la-diak nee mak Inan Aman abandona labarik sira nein ida eskola,” Cipriano akresenta.
Tanba tuir nia bainhira Ministeriu Solidariedade Sosial no Inkluzaun liu husi ekipa apoiu deit mak sasan nesesidade bazika ba familia nee, sei labele responde ba nesesidade familia nee hodi lori hikas labarik sira ba eskola.
Hatan ba ida nee Xefe Departamentu Programa MSSI Baukau, Júlio Alexandre António Belo fo esklaresimentu, hafoin hetan informasaun kona-ba familia nee iha media sosial halo kedas kontaktu ho Autoridade Suku Laisorulai de Cima atu halo identifikasaun, maibe seidauk bele halo, tanba seidauk iha transporte nunee tekniku sira seidauk too iha terrenu, tanba nee seidauk bele promete bainhira mak too halo identifikasaun, maibe konfirmasaun lao nafatin.
“Konfirmasaun lao nafatin ita sei ba haree nia difikuldade nee saida, ita sei ba neeba halo identifikasaun ba sitausaun hotu hotu mak foin ita deside nia hetan deit apoiu hahan ga iha buat seluk neebe mak prezisa atu apoiu tan,” katak Júlio.
Júlio klarifika kondisaun familia nee liu husi faze identifikasaun klean mak foin hatene hodi apoiu, maibe kona-ba apoiu material konstrusaun uma nian tama kompetensia MSSI nian, tanba nee bainhira identifikasaun mak familia refere uma hela fatin la seguru sei MSSI sei koordena ho parte relevante seluk hodi apoiu, maibe MSSI sei fo apoiu tuir MSSI nia papel hanesan fo apoiu nesesidade bazika.
Jornalista: Tomas Reis
Editora: Carme Ximenes
