DILI, STLTIMORLESTE.com – Madre sira husi kongregasaun Alma oferese aan ho fuan no laran, hodi tulun no tau matan ba labarik sira ho nesesidade espesial neebe hela, iha Orfonatu Kongregasaun Alma.
Dehan Madre Asti Soares, husi Kongregasaun Alma ba STL, iha nia knaar fatin Pantai Kelapa, Dili, Kuarta (10/09/2025).
“Labarik sira neebe mak hela hamutuk ho ami iha fatin ida nee agora dadaun ho totalidade nain 20, ami nia apoiu ba labarik sira loron loron mak ami fo ami nia aan tomak no oferese ami nia aan tomak no ami nia tempu tomak ba sira ida nee apoiu husi ami, kona-ba buat seluk husi mos familia husi mos nasaun husi mos Igreza sempre suporta ami ho maneira oin oin, maibe apoiu neebe ami fo mak fo ami nia aan, ami nia pasensia sira, ami nia domin atu nunee sira mos sente domin husi ami hanesan mos labarik seluk neebe hela iha liur,” hatete Madre Asti.
Madre dehan, fatin ba labarik nain 20 sei sufisiente, no madre sira hakarak atu akumula labarik barak neebe ho nesesidade espesial, maibe haree ba fatin la sufisiente.
“Ami hakarak tebes atu simu tan labarik sira, maibe haree ba fatin mak la sufisiente atu simu liu husi 20 ba leten,” hatete Madre Asti.
Nunee mos Estudante, Terezinha Soares Martins, neebe hela iha Orfonato Madre Alma sente kontente, tanba bele hela ho Madre Alma sira.
“Hau sente kontente no orgulhu tebes bele hela iha fatin Madre Alma sira, no bainhira Amu Papa vizita ha fatin ida nee hau sente tanis ,maibe simu Amu Papa ho kontente,” dehan estudante nee.
Jornalista: Emerenciana Pinto / Mikael Mali Mau
Editora: Carme Ximenes
