DILI, STLTIMORLESTE.com – Visi Ministru Justisa, Paulo Remedios sujere Diresaun Jeral Servisu Rejistu Notariadu (DJSRN) atu halao servisu hamutuk ho Ministeriu neebe loke vaga, nunee bele hafasil sidadaun sira neebe hakarak trata dokumentu iha DJSRN.
Kestaun nee Visi Ministru Justisa, Paulo Remedios hatoo relasiona ho vaga neebe fo sai husi SEFOPE hodi rekruta Timor oan ba servisu iha Nova Zelandia.
“Hau sujere ba DJSRN koordena ho Ministeriu seluk, atu halo koordenasaun diak ho Rejistu Notariadu pesoalmente ho Diretor Jeral kona-ba prazu dokumentu, la presiza ema mai barak situasaun nee difisil tebes ba Ministeriu Diresaun Jeral, tenke koordena atu halo melhoramentu ba atendementu publiku,” dehan Visi Ministru Justisa, Paulo ba Jornalista sira iha Mandarin, Dili, Kuarta (10/09/2025).
Nia hatutan, sira neebe ba iha Rejistu Notariadu ho numeru boot, no Diretor konfirma ba sira katak sira trata dokumentu kona-ba kontratu atu ba servisu iha rai liur, tanba nee maka atu halo atendimentu ida neebe diak liu, sei koordena no halo kontaktu ho Ministeriu seluk no mos koalia ho publiku kona-ba kestaun nee.
Bainhira simu informasaun husi publiku no kona-ba difikuldade neebe Notariadu atravesa, tanba nee maka prejensa iha terenu hodi halo monitorizasaun ba situasaun, hodi haree iha area neebe maka Ministeriu bele fo apoiu ba, liu liu iha area neebe publiku presiza.
Iha fatin hanesan, Diretor Jeral Servisu Rejistu Notariadu, Agustinho Gonsalves Viera dehan, ba oin sei iha koordenasaun ba malu, atu melhora diak liu tan servisu neebe iha.
“Ba oin sei buka atu iha koordenasaun ba malu hodi melhora diak liu tan servisu sira neebe iha, atu estende loron ka lae ida nee laos kompetensia diresaun nian,” dehan nia.
Nia hatutan, sei halo koordenasaun ba oin atu loke vaga karik sei haree, ema sira nee pasa ona prienxe ona rekezitu mak bele foin mai trata dokumentu.
Jornalista: Terezinha De Deus
Editora: Carme Ximenes
