DILI, STLTIMORLESTE.com – Iha Munisipiu balu eziste ona balkaun uniku hodi atende publiku sira neebe trata dokumentu, no loron ida atende publiku nain 25 tuir kapasidade neebe iha.
Tuir Visi Ministru Justisa (VMJ), Paulo Remedios katak, iha balkaun uniku publiku bele asesu, iha Dili inklui mos iha Munisipiu sira neebe estabelese ona.
“Balkaun uniku fasilita tiha ona ema barak iha Munisipiu, ita labele kestiona buat ida nee perfeitu ka lae, la iha fatin ida perfeitu iha administrasaun, mas balkaun uniku ajuda no fasilita tiha ona ema barak iha Munisipiu,” dehan VMJ, Remedios ba jornalista sira, iha Mandarin, Dili, Kuarta (10/09/2025).
Governante nee afirma, balkaun neebe iha hamutuk hitu (7), tanba nee publiku laos obrigatoriu tenke mai iha Dili, bele halo sira nia dokumentu iha Munisipiu,”Se karik seidauk iha balkaun uniku Servisu Rejistu Notariadu iha Munisipiu hotu bele tarata iha neeba,” hatete governante nee.
Nia sublina, iha munisipiu sira iha opsaun rua, ida sira ba Rejistu Notariadu, no ida sira bele ba iha balkaun uniku. Ezemplu iha ema 50 iha Rejistu Notariadu no ema nain 25 ba balkaun uniku, iha ona atendimentu ba sira.
Maibe balkaun uniku mos iha nia ekipamentu no material neebe limita, hanesan bateria ba kamera, no iha balkaun uniku iha Koordenador ida, nia maka sei estabelese regra no orariu ba atendimentu, no orariu nee maka determina loron ida sira simu ema nain hira, tuir kapasidade balkaun uniku.
Iha fatin ketak, Komunidade Suku Komoro, Rafael Dos Santos dehan, publiku balu seidauk entende kona-ba balkaun uniku, tanba nee maka sira seidauk ba trata dokumentu iha neeba.
“Hau hanoin publiku balu seidauk iha konhesimentu didiak kona-ba balkaun uniku, maibe se sira hatene ona sira bele trata dokumentus iha neeba,” dehan nia.
Jornalista: Terezinha De Deus
Editora:Carme Ximenes
