AMBENO, STLTIMORLESTE.com – Komemorasaun loron Forsa Armada Libertasaun Nasional Timor Leste, Forsa Defeza Timor Leste (F-FDTL) liu husi Sosiedade Sivil apoiu ai-haan nesesidade bazika ba labarik sira husi orfonatu Topu Honis Kutete Mahata.
“F- FDTL dezde invazaun husi Indonezia mai, ita nia eroi, ita nia veteranus sira harii FALINTIL, kuandu sira harii ona FALINTIL, sira iha moto ida katak, povu mak bee FALINTIL mak ikan, tanba ida nee mak ho komemorasaun loron ezistensia FALINTIL ba dala 50, F-FDTL mai iha nee hakbesik ba ita nia povu sira, liu-liu ba ita nia oan sira, tanba ita nia oan sira mak atu lori ita nia nasaun nee ba oin, tanba ida nee mak F-FDTL tenke hakbesik ba ita nia oan sira neebe mak oras nee daudaun hela iha Orfonatu Topu Honis ida nee, para sira sente katak sira laos mesak, maibe sira hamutuk ho F-FDTL,” dehan Tanente Koronel Valerio Valente husi Departementu Civil Milital (CIMIL) iha orfonatu Topu Honis Mahata, Suku Kutete, Postu Administrativu Pantemakassar, Rejiaun Administrativa Espesial Oecusse-Ambeno (RAEOA), Kuarta (10/09/2025).
Nia dehan, apoiu ohin nee halai liu ba ai-haan nesesidade baziku, oinsa utiliza ai-haan sira nee ba sira nia nesesidade loron-loron hanesan foos, Masin Midar, susu lata cap Enaak, Supermie no ai-haan seluk tan neebe simu direitamente husi Dirijenti Orfonatu Topu Honis, Imelda Liliana Tarung ho labarik Orfonatu Topu Honis Kutete Mahata neebe lokaliza iha Bairu Mahata, Suku Kutete, Postu Administrativu Pantemakassar, Rejiaun Administrativa Espesial Oecusse Ambeno.
Iha fatin hanesan, Diretor Orfonatu Topu Honis, Imelda Liliana Tarung sente kontente kahur ho triste no hakfodak, tanba afinal Orfonatu Topu Honis laos mesak.
“Ami sente kontente kahur ho fuan kanek, tanba afinal ami husi Orfonatu Topu Honis Kutete Mahata laos mesak, maibe hetan vizita husi F-FDTL, neebe ami sente kontente tebes, ida nee dala ruma Maromak ninia obra hetan bensaun ba ami no ami sei fornese ba maluk sira neebe presiza, laos deit ba ami, no ami husu atu apoiu ida nee laos inisiu no ikus ba ami, maibe apoiu ida nee sei bele kontinua. Ami husu obrigadu wain ba Komando F-FDTL neebe haruka ekipa mai vizita ami no apoiu ai-haan,” dehan nia.
Nia haktuir tan katak, labarik Orfonatu Topu Honis neebe hela iha durmitoriu Topu Honis Kutete Mahata hamutuk 34, maibe grasa Maromak nia tulun, ohin hetan prezente labarik ida husi Likisa maibe ohin hetan tan labarik ida mai mesak hakarak hela iha Topu Honis, entaun total agora hamutuk 35 ho bainaka labarik foun nee. Husi total ida nee, iha Orfonatu Topu Honis Kutete labarik hamutuk 13 neebe sei eskola iha Eskola Bazika Filial (EBF) no iha Orfonatu Topu Honis Mahata, iha labarik feto mane Eskola Bazika Sentral no Sekundaria hamutuk 22, iha mos lista seluk neebe la tama iha lista labarik sira hela permanente iha Orfonatu Topu Honis neebe durante nee sira mos hetan apoiu.
Jornalista: Joseph Koa
Editor: Joseph Koa
