DILI, STLTIMORLESTE.com – Relasiona ho publiku balu neebe halo tradusaun dokumentus bom komportamentu husi tetun ba lian inglês deskonfia iha rental balu selu US$ 5.00, husi Diresaun Jeral Servisu Rejistu Notariadu (DJSRN) laiha konhesimentu konaba ida nee.
Diretor Jeral Servisu Rejistu Notariadu (DJSRN), Agustinho Gonsalves Viera dehan, kona-ba informasaun nee nia parte la hatene.
“Hau nein hatene sira halo saida, hau la ba haree, tanba ema nia servisu iha neeba, ita nunka fo servisu ida ba rental no servisu hotu iha laran,” dehan nia ba jornalista sira iha Mandarin, Kinta (11/09/2025).
Nia hatete, laiha konhesimentu kona-ba ida nee, no bandu ona atu halo tradusaun iha liur kuandu selu, se halo gratuitu bele.
Nia informa, tradusaun nee bele halo iha liur mos bele, maibe normalmente fasilita hotu iha laran, se hakarak tradus iha liur mos la problema ida lei la bandu ida. Se parte balu halo tradusaun nee tenke ba iha Notariadu hodi halo sertifikadu tradusaun hodi sertifika katak, nia mak halo tradusaun ba ida nee, laos kualker halo tradusaun.
Nia afirma, ema neebe halo tradusaun iha liur tenke lori fali mai iha notariadu hodi halo autentikasaun, sertifika nia dokumentus no nia nain mak mai asina tradutor tenke mai asina, hodi hatudu halo juramentu katak nia halo tradusaun tuir orijinal.
Tuir fontes konfirmadu ida katak, sira lori bom komportamentu fo ba iha rental sira tradus iha liur, tanba ida iha Notariadu laran ema barak liu, no ida mak tempu neebe sira hatama vaga limitadu.
“Ami hakarak trata dokumentus lalais, ami tenke lori mai iha rental liur, no bom komportamentu neebe halo tradusaun ami selu US$ 5.00,” dehan nia.
Nia hatutan, banhira dokumentus lori mai iha rental halo tradusaun tiha mak sira lori ba hatama fali iha notariadu hodi tau karimbu hodi sira asina.
Tuir nia, iha notariadu laran mos halo tradusaun hotu ho gratuitu, maibe tempu mak demora oituan, tanba nee hakarak tradus urjente tenke iha rental liur hodi foti kedan.
Tuir fontes nee, vaga neebe loke halo ema barak mak trata dokumentus, liu-liu ba iha dokumentus bom komportamentu nian, tanba sai mos hanesan dokumentus esensial hodi konkore ba iha vaga nee.
Jornalista: Terezinha De Deus
Editora: Domingas Gomes
