DILI, STLTIMORLESTE.com – Prezidente Republika (PR), Jose Ramos Horta hatete, durante nia mandatu buka promove dignidade umana no promove igualdade jeneru entre feto no mane.
Horta hatete, durante nia mandatu buka hakbiit feto, foku esensial seluk husi mandatu prezidensial maka empoderamentu feto nian. Asaun sosial iha area ida-nee bazeia ba kompromisiu konstitusional atu promove dignidade umana no igualdade entre feto no mane, pilar fundamental sira ba dezenvolvimentu sustentavel, justu no inkluzivu rain nian.
“Iha sosiedade ida neebe feto sira halao papel sentral iha família no komunidade nia laran, no kontinua hasoru barreira estrutural neebe persistente, fo apoiu ba sira-nia formasaun, kapasitasaun no partisipasaun reprezenta laos deit aktu justisa sosial, maibe mos investimentu estratejiku ida iha dezenvolvimentu nasional,” dehan PR Horta liu husi diskursu iha abertura solene sesaun da III legislativa ba dala VI iha Parlamentu Nasional, Segunda (15/09/2025).
Xefe Estadu hatete, inisiativa sira nee reafirma nia kompromisu metin hodi promove igualdade jeneru no empoderamentu feto, hodi garante partisipasaun ativa feto sira-nian iha setor oioin, liu husi vida publika iha nasaun ida-nee, hodi favorese inkluzaun, igualdade no justisa sosial iha Timor Leste.
“Ami finansia formasaun ba feto hamutuk 554 no fornese apoiu finanseiru hamutuk 215, fo bolsa estudu no fahe kareta vendedor ambulante hamutuk 44 no fogaun tein hamutuk 64, iha parseria ho UN Women, Heineken Timor Leste, no empreza ETTG. Ami fo doasaun kadeira-roda ba feto sira ho defisiensia motora, laptop 10 resin ba estudante sira, no ami mos fahe ona ho konsistente apoiu iha jeneru, iha kontestu material no transporte, neebe korresponde ba investimentu global ida ho montante US$ 60,515.00,” dehan PR Horta.
Nunee mos Klínika Povu nian Harii ona Klínika Prezidensia Republika nian, neebe mos konesidu hanesan klínika povu nian, no nia serbisu ofisialmente hahu iha Abril 2024. Antes data nee, mediku no enfermeiru sira husi Prezidensia Republika partisipa daudaun ona iha projetu sira ajuda umanitaria instituisaun nian, hodi fo asistensia medika ba ema sira neebe vulneravel liu neebe hela iha zona remota sira hosi nasaun, nunee mos ba eskola no universidade nasional sira.
“Ohin loron, ita iha klínika moderna ida ho sala enfermaria rua neebe exelente, ekipadu ho ekipamentu mediku jerasaun ikus liu nian, inklui makina ekografu ida ho teknolojia aas no kama observasaun ida ba internamentu tempu badak nian. Prezidensia nuudar instituisaun dahuluk iha Timor-Leste neebe estabelese “Zona Kardíaka Segura” ho desfibrilador esternu automatiku neebe disponível iha Palasiu nia laran, asesivel ba se deit iha kazu emerjensia,” katak Horta.
Nia dehan, desde nia estabelesimentu, klínika nee fornese ona konsulta medika hamutuk 4,526, atende emerjensia medika hamutuk, halao ona prosedimentu sirurjiku kiik hamutuk 215,h alao ekografia 575, raiu-X 1,149, no ezame adisional sira refere kazu 840 ba Ospital Nasional Guido Valadares (HNGV) no Klínika Bairru Pite; fornese entrega ai-moruk gratuita hamutuk 4,526 no estabelese sistema ida interkonsulta sira neebe ajenda ona ho numeru boot ida hosi mediku espesialista sira, iha koordenasaun direta ho laboratoriu nasional saude nian, hodi permite halao ezame diagnostiku avansadu sira ho lalais no efetivu.
Jornalista: Emerenciana Pinto
Editora: Domingas Gomes
