DILI, STLTIMORLESTE.com – Bankada Partidu Kongresu Nasional Rekunstrusaun Timor (CNRT), Bankada Partidu Demokratiku (PD) nomos Bankada KHUNTO husu Parlamentu Nasional atu kansela prosesu sosa Kareta unidade 65 ba deputadu sira iha Sesta Lejislatura.
Visi Xefe Bankada Partidu Kongresu Nasional Rekunstrusaun Timor (CNRT), Deputadu Patrocínio Fernandes hatete, Bankada tolu kompsotu Partidu CNRT, Bankada PD no KHUNTO halao konferensia imprensa nee hakarak atu kolia Kona- ba desizaun neebe foti ona liu ba kotuk relasiona ho akizasaun kareta unidade 65 ba Deputadu sira iha Sesta Lejislatura.
Tuir nia,Kona ba aloka verba orsamentu atu sosa kareta neebe aprova iha orsamentu jeral estadu 2025 iha Fulan Novembro 2024 liu ba nee baze ba konstituisaun RDTL neebe fo knar importante tolu ba Parlamentu Nasional hodi halo knar nunee funsionamentu estadu nee bele lao.
Nia dehan, tuir estatutu Deputadu neebe aprova iha primeiru Lejislatura mos defini Kona ba direitu no deveres Deputadus sira nian, maibe defini mos Deputadu hotu-hotu tenke iha fasilidade no kondisoens neebe favoravel atu sira bele halao sira nia knar ho diak.
Maibe haree ba preokupasaun publiku nian kona ba prosesu sosa Kareta unidade 65 ba Deputadu sira make Bankada Partidu CNRT, PD no KHUNTO husu Parlamentu Nasional, atu kansela prosesu sosa Kareta unidade 65 ba Deputadu sira.
“Ho nunee mak depois bankada tolu halo estuda, halo analiza didiak ba situasaun neebe hatur amk nia hanoin ba estatu no nasaun mak ami deside hamutuk Bankada tolu hodi hanoin katak, ami Bankada tolu husu fila falo ba parlamentu Nasional atu Kansela prosesu tomak kona ba akizasaun kareta ba Deputadu sira,” hatete Deputadu Patrocínio ba jornalista sira, liu husi konferensia Imprensa, neebe halao iha sede Bankada CNRT, segunda (15/09/2025).
Nia hatutan, Bankada tolu deside Kansela Sosa Kareta laos hetan presaun maibe hare ba preokupasaun publiku nian.
“Maibe desizaun ida nee tanba laos presaun maibe desizaun nee husi analiza ami haree katak, preokupasaun deputadu sira loron-loron kona ba transporte nee mak talves halo ami tauk no la haree, liu oinsa preokupasaun publiku nian tanba nee mak ohin deside husu parlamentu Nasional atu Kansela prosesu sosa kareta,” dehan nia.
Jornalista: Alberto Menezes
Editora: Carme Ximenes
