DILI, STLTIMORLESTE.com – Prezidente Republika Jose Ramos Horta husu manifestante sira labele estraga propriedade estadu estudante hatudu nafatin sentidu responsablidade iha demostrasaun hasoru Parlamentu Nasional.
Prezidente Republika Jose Ramos Horta hatoo kestaun nee ba jornalista iha parlamentu nasional Segunda (15/09/2025) husu estudante no sosiedade sivil neebe mak halo demostrasaun hasoru deputadu sira iha parlamentu nasional katak bele halo demo maibe labele estraga propriedade estadu nia.
Relasiona ho manifestasaun neebe organiza husi Estudante Universitariu Timor-Leste (EUTL) halo iha resintu kampus Universidade Nasional Timor Lorosae (UNTL), sentral hodi kontra desizaun Parlamentu Nasional atu sosa sosa karreta 65 ba deputadu sira, ho asaun nee Prezidente Republika, Jose Ramos Horta husu ba manifestante sira labele estraga propriedade estadu, liu-liu korpu diplomatiku nian.
Iha biban nee Prezidente Republika hatete estudante sira tenke hatudu sira nia sentidu responsabilidade, bele hakilar koalia hatoo ejijensia maibe labele estraga fali sasan estadu nia.
“Hau husu deit ba sira, labele estraga propriedade estadu nian, korpu diplomatiku nian. Estudante sira tenke hatudu sira nia sentidu responsabilidade, manifestasaun diak, koalia diak, hakilar diak, ezijensia oi-oin bele halo, maibe nunka bele halo violensia nee mak diak, “ dehan Prezidente Republika.
Aleinde nee iha Prezidente Republika temi Prezidensia Republika too agora la sosa karreta karik ida nee atu fo hanoin hela ba Parlamentu Nasional liga ho situasaun agora, hatan ba kestaun nee Prezidente Republika hatete nia mos viajen ba foho haree fatin balun perigozu tebes tanba Estrada ladiak.
“Hau hatete deit ida nee, hau mos halo viajen lubuk ida ba foho, ba fatin balun neebe perigozu tebe-tebes ba hau nia vida rasik, tanba estrada la diak. Maibe uza nafatin karreta neebe mai husi kotuk, neebe diak hela aguenta la iha problema. Maibe hau husik ba Parlamentu Nasional mak hatene, orgaun soberanu, hau nia hanoin Prezidensia Republika, Governu, Parlamentu Nasional la presiza kada mandatu foun sosa karreta foun,” dehan PR Horta.
Prezidente Republika hatete ida-idak kuidadu diak liu ba karreta sira, tanba karreta sira iha Prezidensia Republika nee barak mai ona balun tinan 10 ona, balun liu tan.
“Hau temi nee deit laos fo lisaun ruma instuituisaun sira seluk, hau temi deit hatete nee mak hau halo,” hakotu PR Horta.
Jornalista: Emerenciana Pinto
Editor: Xisto Mendonca
