DILI, STLTIMORLESTE.com – Prezidente Republika (PR), Jose Ramos Horta sempre luta makaas ba defeza valor Igualdade Fraternidade Umana, tanba Igualdade Fraternidade Umana sai pilar esensial ba unidade.
Kestaun nee hatoo husi Prezidente Republika, Jose Ramos Horta liu husi nia diskursu iha abertura solene sesaun da III legislativa ba dala VI iha Parlamentu Nasional, Segunda (15/09/2025).
“Aleinde nee Programa Fraternidade Umana Hau sempre luta beibeik ba defeza valor sira nian hanesan igualdade, fraternidade, solidariedade no toleransia, tanba hau komprende sira hanesan pilar esensial ba unidade, dame no dezenvolvimentu sustentavel,” dehan Prezidente Republika.
Prezidente Republika destaka Deklarasaun kona-ba Fraternidade Umana ba Dame Mundial no Moris Hamutuk, neebe ko-autor husi Santu Padre Francisco no Grande Imam hosi Al-Azhar, Cairo, Prof. Dr. Ahmad Al-Tayyeb, neebe proklama iha Abu Dhabi iha loron 4 fulan-fevereiru tinan 2019, no aprova ho unanimidade hosi Parlamentu Nasional, hanesan instrumentu nasional iha loron 13 fulan-maiu tinan 2022, sai hanesan nasaun dahuluk neebe halo ida-nee ofisialmente, realizasaun ida neebe destaka Timor-Leste nia pozisaun perkusora iha nível mundial.
Entre 2022 no 2025, Programa Fraternidade Umana Prezidensia Republika nian, iha koordenasaun metin ho instituisaun sira Estadu nian, líder relijiozu sira no autoridade edukasional sira, halao ona papel partikularmente ativu iha munisípiu sira no postu administrativu sira iha teritoriu nasional tomak, hodi alkansa, too ohin loron, joven estudante sira liu 2.400.
Jornalista: Emerenciana Pinto
Editor: Xisto Mendonca
