DILI, STLTIMORLESTE.com – Prezidente Republika (PR), Jose Ramos Horta simu Karta Kredensial husi Embaixador Foun Gresia nian mai Timor Leste, iha Palasiu Prezidensial, Nicolau Lobato, Bairo Pite, Dili.
Iha loron Tersa nee (16/09/2025) Prezidente Republika, Jose Ramos Horta simu karta Kredensial husi Christodoulos Margaritis, nuudar Embaixador Estraordinariu no Plenipotensiariu foun Naun-Rezidente Republika Helenika nian mai Timor Leste, iha serimonia neebe halao iha Palasiu Prezidensial, Nicolau Lobato.
Relasaun diplomatika entre Timor-Leste no Gresia ofisialmente estabelese iha loron 4 Abril 2003, liu husi komunikadu konjuntu neebe asina iha Nasoins Unidas (ONU) iha Nova Iorke. Enkuantu envolvimentu atual halao prinsipalmente liuhosi forum multilateral sira hanesan ONU no UE, relasaun bilateral sira pozitivu no iha potensial promisor ba kreximentu iha futuru.
Timor Leste hein atu esplora kooperasaun konkreta ho Gresia iha area xave sira neebe iha interese ba malu hanesan marítima no ro, enerjia, no turizmu, ho objetivu atu hetan benefísiu hosi esperiensia avansadu Gresia nian.
Embaixador Christodoulos Margaritis nuudar diplomata ida neebe iha esperiensia ho servisu durante tinan 25 resin. Espesialista ida iha lei internasional no europeu, Embaixador Margaritis lori esperiensia barak husi kargu xave sira iha mundu tomak, inklui serbisu nuudar Konsul Jeral iha Hong Kong, Enviadu Espesial ba Líbia, no Vise-Xefe Misaun nian iha Kazakistaun no Kanada. Nia hatene koalia lian Gregu, Alemaña, Ingles no Franses. Embaixador Margaritis simultaneamente nuudar Embaixador Gresia nian ba Republika Singapura no Sultanatu Brunei nian (naun- rezidente).
Iha biban nee Prezidente Ramos Horta afirma, ho mandatu embaixador foun nee bele hametin parseria neebe metin entre nasaun rua.
“ita iha konfiansa katak iha ita boot nia reprezentasaun, ita bele harii parseria ida neebe metin liu, hodi esplora potensial boot neebe eziste entre ita-nia nasaun sira, partikularmente iha setor marítimu, neebe importante tebes ba ita nia nasaun rua nee,” dehan PR Horta.
Prezidente Ramos Horta hatoo nia konfiansa katak Embaixador foun nia esperiensia neebe boot sei kontribui makaas liu tan ba aprofunda relasaun bilateral entre Timor Leste no Gresia.
Jornalista: Emerenciana Pinto
Editora: Carme Ximenes
