DILI, STLTIMORLESTE.com – Iha loron 29 Setembru tinan nee bolsa kandidatu profesores tinan 2024 sei simu tomada de pose.
Kestaun nee hatoo husi Diretor Nasional Rekursu Umanu iha ME, João Amaral ba STL, Tersa (16/09/2025).
Nia dehan, kona ba professores 187 nee, orsida ou aban Ministeriu Edukasaun sei fo sai avizu liu husi pagina facebook Ministeriu katak hahu iha 22 até 27 fatin formasaun sei halao iha INFORDEPE. Formasaun nee ho objetivu atu kapasita no konhesimentu baziku manorin foun sira molok koloka ba eskola kolokadu. Tuir planu inisiu atu halo iha Rairobo no akademia polisia nian maibe la akontese no muda fali halao iha Salaun Ian Martin INFORDEPE.
João akresenta, formasaun preparatoriu ba manorin 187 nee hala’o durante semana ida nian laran husi loron Segunda 22 too loron Sesta 27.
“Se tempu iha ami sei halo simulasaun ba sira, Segunda dia 29 sira sei simu pose hodi koloka ona ba fatin neebe sira rasik aseita ona. Nee duni Segunda 29 ne’e fo pose ba sira, nee data neebe maka fiksu ona,” João esplika.
Jornalista: Jacinta Sequeira
Editor: Domingas Gomes
