DILI, STLTIMORLESTE.com – Prezidente Repúblika (PR), José Ramos-Horta sei ko’alia kona-ba situasaun Timor-Leste (TL) iha konferénsia ida iha universidade boot ida, iha Sidney, Austrália.
Horta hato’o informasaun ne’e ba jornalista sira iha Palásiu Prezidensiál Nicolau Lobato, Bairru Pité, iha tersa-feira (13/10/2026). Nia sei sai oradór úniku iha konferénsia ne’e, ne’ebé sei partisipa akademiku no estudante sira.
“Ha’u sei ko’alia kona-ba situasaun iha Timor-Leste, inklui dezenvolvimentu no situasaun internasionál. Estudante no akademiku sira mós hakarak rona ha’u-nia opiniaun,” dehan Prezidente Repúblika.
Depois remata atividade iha Sidney, Horta sei fó entrevista ba jornalista sira iha Austrália, antes kontinua viajen ba Perth.
Iha Perth, sei iha preparasaun ba Konferénsia Nasaun Unidas kona-ba Mudansa Klimátika (COP31). Horta esplika katak nia sei avalia uluk nesesidade atu partisipa, liuliu tanba iha kompromisu seluk ne’ebé tenke kumpre iha fulan Novembru.
Nia temi katak ko’alia ona ho Xanana Gusmão kona-ba possibilidade atu partisipa, maibé sei konsidera mós konsulta ho profesór Adão Barbosa antes foti desizaun.
Prezidente Repúblika subliña katak COP31 importante, tanba xefe Estadu barak sei partisipa iha konferénsia ne’e.
Horta mós konfirma katak mudansa klimátika no fenómenu El Niño bele sai tópiku iha entrevista ho jornalista sira iha Sidney no Perth.
“Ha’u ko’alia ona ho ministériu relevante sira kona-ba El Niño, atu prepara an ho di’ak, tanba sientista sira hatete katak fenómenu ne’e bele kontinua to’o 2027,” dehan Horta.
Nia alerta katak se El Niño kontinua to’o Juñu 2027, mota sira bele maran, no situasaun ne’e bele fó impaktu ba ema no animál sira.
(eme)
