DILI, STLTIMORLESTE.com – Prezidente Republika (PR), Jose Ramos Horta husu Governu investe makaas no hatun problema neebe povu hasoru iha rai laran.
Prezidente Republika Jose Ramos Horta hatoo kestaun nee ba jornalista iha Parlamentu Nasional, Segunda (15/09/2025).
Nia hatete, oras nee povu sei hasoru problema oin oin, tanba nee Governu presiza esforsu makaas nunee bele rejolve problema neebe povu hasoru iha area remotas sira.
“Importante liu ba hau, prioridade neebe hau hanoin nivel nasional governu tenke haree, tau matan oinsa atu investe boot atu hatun problema boot iha rai laran neebe kiak sira nian,” dehan Prezidente Republika.
Nia hatete, nia sempre fo atensaun bebeik oinsa bele tau matan ba edukasaun, saude, infraestrutura nunee povu sira bele asesu.
Prezidente da Republika hatutan, iha polítiku internasional prioridade boot liu mak adezaun ba ASEAN nee hotu-hotu hatene ona, koalia dala barak ona.
Ajenda todan teb-tebes ba Parlamentu Nasional, liu-liu buat hotu-hotu neebe ligadu ho ASEAN, tratadu komersias, tratadu adezaun ba ASEAN nian.
Jornalista: Emerenciana Pinto
Editora: Domingas Gomes
