DILI, STLTIMORLESTE.com – Prezidente Republika (PR), Jose Ramos Horta hatete, estudante universitariu hamutuk ho sosiedade sivil halo demostrasaun hasoru Parlamentu Nasional (PN), tanba hakarak kansela sosa kareta no hapara pensaun vitalisia ba deputadu 65.
Prezidente Republika Jose Ramos Horta haktuir liafuan nee ba jornalista sira iha Palasiu Prezidensial Nicolau Lobato, Bairo Pite, Tersa (16/09/2025).
Nia hatete, ezijensia estudante sira nia laos buat foun, maibe halo kleur ona hodi kontra politika Prezidente Parlamentu Nasional Maria Fernanda Lay nian, hodi sosa viatura 65 ba deputadu nain 65, tanba oras nee povu sei moris kiak.
Nia hatete, assume kargu nuudar Deputadu no Deputada, nomos membru Governu ida nee atu ba serbi laos ba ezije fali osan ba aan, no ezije fali uma no seluk tan, maibe ba atu serbi povu tanba reprezenta povu.
“Premeiru estudante sira nia ejijensia nee laos buat foun kleur ona kleur ona buat ida sosa kareta prado nee koalia dala barak ona tinan sira nia laran, maibe agora partidu CNRT, PD, Khuntu hamutuk halo ona stagmentu ida ke kansela sosa kareta nee, orsamentu iha maibe seidauk sosa. Neebe sosa kareta nee kansela ona,” dehan Horta.
Prezidente Republika afirma, ezijensia seluk neebe prezidente rona mak oinsa PN halo lei ida hapara pensaun vitalisia.
Xefe Estadu hatutan, se atu halakon pensaun vitalisia presiza halo reforma ida neebe klean, tanba assume kargu iha Governu no PN, nee misaun laos ba ezije osan, uma no seluk tan.
“Hau pesoalmente hau nia hanoin mak nee tenke halo reforma klean, ita ba Governu ita ba nudar misaun ida, ita ba parlamentu nuudar misaun ida, laos hanesan empregu ida. Se ita ba Governu no ba parlamentu, tanba ita fiar buat ruma atu serbi nasaun, entau o labele hanoin ba osan, ba pagamentu vensimentu maibe hanoin misaun ida o kumpre, tanba misaun nee tinan 5 bele tinan 10. Karik partidu manan fila fali nee misaun ida entau tenke haree,” katak Horta.
Xefe Estadu hatutan, assume kargu ba atu servi, laos ba hanesan empregu ida hodi ezije uma estadu, ida nee mos Prezidente la konkorda, tanba antes assume kargu hela ona uma laos hela iha iha ponte okos. Se hela iha uma kontinua hela iha uma laos eziji uma estadu, alende nee kareta mos iha ona maibe eziji tan kareta Governu nian, ida nee lalika. No ba parlamentu mos hanesan kareta parlamentu karik ba fiskalizasaun ruma presiza kareta, uza kareta parlamentu laos sosa sai pribado deputadu no deputada sira nia.
Jornalista: Emerenciana Pinto
Editora: Domingas Gomes
