DILI, STLTIMORLESTE.com – Organizasaun Estadu Afrika, Karibe no Pasífiku (OEACPS) mai iha Timor Leste (TL), hodi hametin lasu amizade.
Prezidente no Laureadu Nobel ba Pas, J. Ramos Horta, simu delegasaun nivel aas husi Organizasaun Estadu Afrikanu, Karibe no Pasífiku-Uniaun Europeia (OACPS-UE) Asembleia Parlamentar Konjunta (JPA) iha Palasiu Prezidensial Nicolau Lobato, Bairo Pite, Tersa (16/09/2025).
Enkontru nee nuudar parte sentral husi delegasaun nia misaun ofisial mai TL hodi rekolla informasaun, neebe halao iha loron 14 too 18 Setembru. Diskusaun sira foka ba reforsu parseria estratejiku entre TL no Uniaun Europeia, neebe harii iha valor kompartilladu sira kona-ba demokrasia, direitus umanus, no dezenvolvimentu sustentavel.
Iha biban nee Prezidente Ramos-Horta fo benvindu ba delegadu sira, hodi sublina importansia husi kooperasaun multilateral.
“Parseria entre TL no Uniaun Europeia harii iha kompromisu neebe fahe ba demokrasia no dezenvolvimentu sustentavel. Vizita ida nee husi Asembleia Parlamentar Konjunta nuudar testemuna ba ita-nia relasaun neebe metin no fo oportunidade valioza atu alina ita-nia prioridade sira ba futuru, partikularmente iha kriasaun oportunidade ba ita-nia juventude no no asegura kresimentu inkluzivu ba Timoroan hotu,” dehan nia.
Durante sira nia vizita, delegasaun OEACP-UE nian sei halao enkontru sira neebe komprensivu ho ofisial sira governu nian iha nivel aas, inklui Prezidente Parlamentu Nasional, membru sira gabinete nian, korpu diplomatiku sira, no líder sira hosi sosiedade sivíl no setor privadu. Misaun nee ho objetivu atu hetan kompriensaun klean, no direta kona-ba TL nia progresu sosio-ekonomiku, estrutura governasaun, no papel neebe evolui iha rejiaun nee.
Envolvimentu nível aas ida-nee sublina kompromisu duradoura husi Uniaun Europeia no ninia parseiru sira OACPS nian hodi apoia jornada dezenvolvimentu Timor Leste nian no hodi aprofunda relasaun polítika no ekonomika sira.
Jornalista: Emerenciana Pinto
Editora: Domingas Gomes
