DILI, STLTIMORLESTE.com – Ema deskonhesidu sunu Eskola Cafe iha Munisipiu Likisa Vila, akontesimentu nee akontese maizumenus ohin tuku 2:00 madrugada.
Diretor Edukasaun Munisipiu Likisa, Julio da Silva dehan, akontesimentu nee ohin madrugada maizumenus tuku 2:10 madrugada.
“Akontesimentu nee ohin madrugada maizumenus tuku 2:10. Ohin ita ba ona iha neeba, ita hein deit halo relatóriu ba nasional, maibe ladun grave. Estragus nee ahi han deit kadeira ida, meza rua, ho kurtina janela ninia rua ho arus janela ninia. Nee ema deskonhesidu mak sunu, tanba seguransa mesak,” dehan nia ba jornalista STL liu husi telefone, Kinta (18/09/2025).
Julio informa, momentu ema deskonhesidu sunu eskola nee, tanba seguransa mesak, nia labele duni tuir ema nee. Ema deskonhesidu nain rua nee konsege halai liu, tanba seguransa preokupa hamate ahi no ema nain rua nee halai liu. Sekuandu seguransa mak kaer ema nee, entaun ahi bele han hotu eskola nee.
Nia dehan, ho akontesimentu nee informa ona ba iha eskuadra, tanba eskuadra PNTL mos besik hela no parte polisia mos mai too ona iha fatin akontesimentu hodi haree, tanba sei halo kontaktu ho parte Komandante Munisipiu nian para bele alerta ba iha munisipiu tomak, ho nunee OPS sira bele tau matan ba eskola sira, tanba akontesimentu nee kalan deit.
Nia hatutan, Eskola Cafe nee iha guarda eskola nain 4 neebe durante nee sira sempre fahe malu, maibe iha momentu akontesimentu nee seguransa ida deit mak jaga hela eskola, neebe la konsege haree ema deskonhesidu sira nia oin, tanba lori hena metan kesi metin oin.
Jornalista: Jacinta Sequeira
Editora: Domingas Gomes
