DILI, STLTIMORLESTE.com – Tribunal Judisial Primeira Instansia Dili liu husi despaisu ikus deside hodi aplika pena multa ba arguidu inisial LPP hanesan laen, neebe komete krimi hasoru lezada ho inisial VA hanesan feen.
Iha desizaun nee Juiza prosesu Jumiati Freitas deklara katak, iha sala julgamentu laran arguidu konfesa imparsial ba faktus neebe iha.
Tanba nee Tribunal haree katak, arguidu foin primera vez mai iha Tribunal, ho nunee Tribunal deside atu aplika pena multa 90 dolat ba arguidu.
Tribunal mos deklara, kuandu arguidu la kumpri pena multa, arguidu sei tama iha Prizaun durante loron 60.
Juiza prosesu mos fo hanoin ba iha arguidu, atu iha futuru labele pratika tan krime, se pratika krime Tribunal sei aplika pena neebe todan.
Tuir akuzasaun neebe iha katak, ih loron 02 fulan Novembru tinan 2020, arguidu lori liman basa dala ida kona iha lezada nia hasan sorin loos, iha loraik lori ain tebe dala ida iha nia kanosen sorin, no lori ain sama tan dala ida iha nia kotuk laran.
Konsekuensia husi aktu nee sente moras makas iha hasan sorin loos, moras iha koskoleta sorin karuk, no kotuk laran.
Kauza husi problema nee tanba lezada hirus nia alin mane, ho nunee maka arguidu nervozu hodi baku lezada.
Tanba nee, Ministeriu Publiku akuza arguidu komete krime Violensia Domestika ho Forma Ofensa Integridade Fisika Simples, neebe previstu iha artigu 145 husi Kodigu Penal.
Audensia julgamentu nee, prezide husi Juiz Singular Jumiati Freitas, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku Marsal Mascarinhas.
Jornalista: Terezinha De Deus
Editora: Carme Ximenes
