BAUKAU, STLTIMORLESTE.com – Eskola Sekundaria Jeral Filial (SJF) Kilik Waigae iha Suku Kaibada Makasae, Postu Administrativu Baukau Vila, Munisipiu Baukau, la iha sala biblioteka ba estudante sira no edifisiu ba profesores sira.
Koordenador eskola SJF Martinho de Oliveira relata, durante ezistensia eskola refere laiha sala ba estudante no profesores sira, tanba nee profesores sira inisia didin uma eis merkadu kaibada makasae nian utiliza ba sala estudante no edifisiu profesores nian halao prosesu aprendizajen, maibe iha tinan hirak liu ba Governu liu husi Ministeriu Edukasaun apoiu ona konstrusaun sala foun 6, maibe sei falta mak sala biblioteka ba estudante sira no edifisiu ba profesores sira.
“Ami eskola Kilik Waigae nee problema mak eskritoriu ba profesores sira ida mak biblioteka entaun ami utiliza deit sala estudante nian, maibe profesores nian laiha, profesores mai balun tur deit iha liur hanoin hotu tiha sira fila, tanba laiha sala hodi sira tuur,” hateten Martinho ba STL, iha knaar fatin eskola SJF Kilik Waigae Kaibada Makasae, Segunda (22/09/2025).
Kestaun laiha sala biblioteka no edifisiu ba profesores parte eskola foti inisiativa okupa sala foun 1, husi sala 6 sai edifisiu ba profesores sira no sala biblioteka ba estudante sira.
Mezmu eskola foti ona inisiativa okupa sala foun 1 sai sala biblioteka no edifisiu ba profesores sira la sufisiente, tanba medida kloot, nunee labele akumula hotu profesores sira.
“Pedidu ami hatoo beibeik maibe la implementa too ohin loron laiha realidade,” Martinho argumentu.
Koordenador eskola nee husu Ministeriu Edukasaun atu konstrui sala biblioteka ba estudante sira no edifisiu ba profesores nunee bainhira profesores ida remata ona nia oras hanoin nian iha sala ida bele tur deskansa hafoin kontinua hanorin tan estudante sira iha sala seluk, tanba durante nee laiha edifisiu ba profesores sira obrigado profesores sira tenke tuur deit iha liur.
Iha fatin hanesan estudante desimu Segundu Anu, Maria de Jesus Ximenes hateten, prosesu aprendizajem iha eskola Sekundaria Jeral Filial Kilik Waigae durante nee lao diak, tanba profesores sira ativu iha sala estudante, maibe difikulta profesores sira mak laiha edifisiu ba profesores sira no laiha sala biblioteka ba estudante.
“Ami falta sala biblioteka ami hakarak atu lee laiha, difikulta ami atu aprende aumenta tan la iha, dehan ba ami nia Ministeriu Edukasaun konstrui sala biblioteka nunee estudante sira lee livru karik ho diak,” katak estudante Maria.
Liga asuntu nee jornalista STL tenta konfirma Diretor Servisu Munisipal Edukasaun Baukau, maibe la iha fatin atu fo komentariu, tanba tuir hela atividade balun iha fatin seluk.
Entretantu eskola Sekundaria Jeral Filial Kilik Waigae iha professores nain 16 responde ba total estudante nain 169 husi desimu anu too desimu anu anu.
Jornalista: Tomas Reis
Editora: Carme Ximenes
