KEFAMENANU, STLTIMORLESTE.com – Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu iha ambitu komemorasaun loron Aniversariu Timor Tengah Utara (TTU) ba dala 103 iha tinan 2025, lider nasaun rua nee kompremetidu atu hametin kooperasaun iha setor Turizmu Kultura no Ekonomia nuudar Atone Pah Meto ho lingua no kultura hanesan maun alin.
Desklarasaun nee hatoo husi Prezidente Autoridade Rejiaun Administrativa Espesial Oecusse-Ambeno, Regio da Cruz Salu ba STL hafoin partisipa iha serimonia isar bandeira Nasional Indonezia nian iha ambitu komemorasaun loron aniversariu TTU ba dala 103 iha tinan 2025 neebe halao iha edifisiu Administrasaun Kefamenanu, Segunda (22/08/2025).
“Ohin ami mai partisipa iha iha loron aniversariu TTU ba dala 103 hodi hatudu ba mundu katak odamatan ema atoni meto ida deit maka Oecusse no liu husi loron istoriku nee atu deklara katak tempu ona atu hametin setor Turizmu kultura no Ekonomia liu husi kria merkadu iha fronteira atu povu rai rua bele buka moris nomos hametin kultura atu atoen meto neebe iha bandeira 2 maibe haree malu nuudar maun alin hodi kontinua hametin paz no estabilidade,” dehan PA-RAEOA, Regio da Cruz Salu.
Nia haktuir tan katak, tempu ona atu haree malu nuudar maun alin iha linha fronteira hodi nunee povu rai rua bele moris diak iha futuru.
Iha oportunidade hanesan Administrador Timor Tengah Utara , Yosep Falentinus Kebo dehan, ohin konvida Prezidente Autoridade RAEOA ho Koordenador Zona Ekonomika Espesial ba Dezenvolvimentu Oecusse-Ambeno (ZEEDOA) inklui Diretor Rejional mai partisipa iha loron aniversariu TTU ba dala 103, hodi hatudu identidade kultura atoen meto neebe lidera husi ema atoen meto iha tempu agora tanba iha tempu pasadu kolonial seidauk fahe ema atoen meto, iha karakteristiku kultura no lian hanesan, tanba nee TTU bolu atu hametin relasaun atu tau matan ba povu rai rua nia moris diak.
“Ami ohin konvida Autoridade RAEOA ho ninia estrutura mai marka prezensa iha ami nia loron istoriku ida nee, atu hatudu ba publiku katak, ami la iha fronteira kultura, fronteira nasaun maka iha bandera TL-Indonezia, maibe haree ba kultura la iha fronteira, tanba nee hanesan atoen meto Ilha Timor ida deit, nuudar lideransa tenke hamutuk atu dudu povu iha fronteira nia ekonomia tenke diak. Ami la kohi Povu Oecusse maka moris diak mesak, maibe povu rua tenke kaer liman ba malu, hodi moris hamutuk nuudar maun alin maske diferente nasionalidade,” dehan nia.
Nia haktuir tan katak, ba oin sei estabele serbisu kooperasaun iha setor edukasaun, saude, ekonomia sosial no kultura, atu nunee kontinua hametin relasaun tanba desde uluk Cono, Oematan, Babu, Bifel, Salu, Colo, Elo, Kebo, Bana, apalidu sira nee mesak ida deit ho sira nia liurai maka Sombai Sila, Beno Sila, Afoa sila no liurai Sila maka ukun renu, entaun ohin deklara ho loron TTU ba dala 103, tempu ona atu halibur maun alin hodi hateke ba futuru povu moris diak.
Tuir observasaun STL iha ambitu komemorasaun loron Aniversariu TTU ba dala 103, nakonu ho sentimentu klean nuudar maun alin, hateke ba istoria tempu pasadu nakonu ho domin, dame. Komemorasaun nee realiza ho isar bandeira, hatudu atrakasaun drum band terjun payung husi Polisia Aero Indonezia anima tebes bainhira sira semo uza sira nia terjun payung tun direitamente iha kampu Futeboll Kefamenanu ukun nain no povu rai rua simu sira ho ksolok no alegria.
Jornalista: Joseph Koa
Editor: Joseph Koa
