BAUKAU, STLTIMORLESTE.com – Durante fulan Agostu tinan nee Sentru Tratamentu Saude Veteranus David Alex Dai-Tula (CTSV-DADT-), rejistu pasiente hamutuk 1.285.
Responsavel Sentru Tratamentu Saude Veteranus Elizio Siqueira Ximenes esplika, numeru pasiente refere kompostu husi numeru veteranu 825 no komunidade jeral 460.
“Moras neebe durante pasiente mai konsulta tipu aas liu mak moras selu-seluk, ISPA, moras pulmaun, tensaun, problema nehan, estomuk, tiroide, kulit no diabetes mellitus,” Elizio informa ba STL, iha knaar fatin Reamare Bahu, Segunda (22/09/2025).
Nia sublina, durante fulan Agostu CTSV-DADT rejistu numeru moras aas liu mak hanesan tipu moras selu-seluk hamutuk 409, Infesaun Respiratoriu Agudu (ISPA) 318, moras pulmaun 248, hypertensaun 188, moras ruin 129, problema nehan 63, estomuk 51, tiroide 61, moras kulit 59 no diabetes mellitus 17.
Nia argumentu, moras hirak nee hanesan ISPA kauza husi rai rahun no mudansa iklima, tensaun no moras sira seluk tan efeitu husi hahan inklui fator jenetiku no seluk tan.
“Pasiente hirak nee ita rujuk ba nee ida mak kanker, ida anemia no ida tan fali moras fuan nee mak ita haruka ba,” Elizio informa
Responsavel CTSV-DADT nee deklara, durante fulan Agostu nee mos CTSV-DADT liu husi espesialista transfere pasiente nain tolu kompostu tipu moras fuan kroniku, kanker espfagu no anemia resevia ho valor normal tun, nunee transfere ba Hospital Rejional Eduardo Ximenes (HoREX) Baukau hodi hetan tratamentu diak husi mediku sira, tanba fasilidade iha CTSV-DADT sei menus atu atende pasiente neebe moras kondisaun grave.
Jornalista: Tomas Reis
Editora: Carme Ximenes
