DILI, STLTIMORLESTE.com – Ministeriu Publiku liu husi Prokurador Jeral Republika (PJR), Nelson de Carvalho hatete, prosesu jogu online neebe akontese iha Oekusi, husi parte Polisia Sientifiku Investigasaun Kriminal (PSIK) entrega ona ba iha Ministeriu Publiku hodi kontinua investigasaun.
“Submete ona mai iha nee, tanba kazu refere iha primeiru interogatoriu nain neen tama tiha ona Prizaun Preventiva iha Bekora,” dehan PJR, Nelson ba jornalista sira iha Edefisiu PJR, Mandarin, Dili, Segunda (22/09/2025).
Nia dehan, prosesu jogu online iha Oekusi nee laos ema nain neen deit,” prosesu ida Oekusi nee laos ema nain neen deit, sei iha tan Ministeriu Publiku tuir hela, iha investigador PSIK sira mos tuir hela,” dehan nia.
Nia hatutan, prosesu neebe tama ona Ministeriu Publiku sei kontinua lao, kontinua haklean investigasaun rekolha provas, buka testemunha, tuir buat neebe mak tramitasaun prosesual.
Maibe nia husu atu publiku sira bele akompanha nafatin, hodi hatene kona-ba prosesu sira neebe akontese iha ita nia rai laran.
Antes nee iha loron 29 fulan Agostu tinan 2025, Tribunal Judisial Primera Instansia Oecusse, liu husi despaisu ikus ba prosesu primeiru interogatoriu, deside hodi aplika medida Prizaun Preventiva, ba arguidu sira neebe deskonfia envolve iha Jogo online iha Otel Oe-Upu Rejiaun Administrativu Espesial Oecuse Ambeno (RAEOA).
Iha despaisu Tribunal nian deside aplika medida Prizaun Preventiva, ba arguida ida no mos arguidu nain lima, tanba konsidera iha indisus ba krime neebe Ministeriu Publiku promove mai iha Tribunal, krime Jogo Ilega no mos Burla Informatika.
Arguidu no arguida mesak sidadaun estranjeiru, nain tolu husi nasionalidade Xina, nain ida husi nasionalidade Nepal, no nain ida husi Indonezia.
Tuir regra neebe iha, prosesu sira neebe iha primeiru interogatoriu fo dalan ba iha parte sira, atu la aseita despaisu Tribunal nian bele liu fali husi sira nia defeza, atu halo fali rekursu ba iha Tribunal Rekursu (TR) tuir prazu neebe iha, dentru de loron 30 sura husi loron neebe Tribunal sita despaisu ba iha defeza.
Jornalista: Terezinha De Deus
Editora: Carme Ximenes
