DILI, STLTIMORLESTE.com – Atu implementa menu merenda eskolar tuir manual neebe iha, depende ba produsaun ai-haan iha munisipiu ida-idak.
Xefi Departamentu Programa Merenda Eskolar iha ME, Belchior Maria Almeida Barros dehan, laiha razaun atu eskola la kumpri menu merenda eskolar tuir iha manual, maibe menu refere depende ba Produsaun aihan iha Munisipiu ida-idak. Informasaun neebe hatoo mai husi Koordenador Munisipiu sira katak, eskola sira kuaze kumpri hotu menu neebe iha.
“Iha munisipiu ita iha menu neebe refere ba produsan aihan iha munisipiu ida-ida katak, menu nee depende ba produsan aihan neebe produs husi munisipiu ida-ida. Neebe laiha razaun atu sira la kumpri menu neebe iha. Falta de produsan nee iha, haree termos de kontratu EJP sira la kumpri hapara sira,” dehan Belchior ba STL, Tersa (23/09/2025).
Nunee mos, Dodolfo Henrique Aparicio nuudar Adjuntu Inspetor Jeral iha ME dehan, Ministeriu Edukasaun (ME), identifika eskola balun implementa merenda eskolar la tuir menu neebe mak establese ona husi MS no ME.
“Tuir dekretu lei nu 62/2023, merenda eskolar iha PAM nian okos, maibe Edukasaun Munisipiu kontinua halo konsultasaun para bele kontinua halo kontrolu ba merenda eskolar, neebe mak EJP ho ninia membru sira implementa iha ita nian eskola ida-idak, iha teritoriu laran tomak. Identifika Ita identifika, tanba hetan mos informasaun husi ami nian inspektor eskola sira katak, eskola lubuk ida mak la tuir menu neebe mak terminal tiha ona husi MS no ME,” dehan Dodolfo.
Nia informa, eskola balun deit implementa merenda eskolar la tuir menu neebe termina ona, dala ruma menu nee iha manual mos laiha, nee mak hanesan manu tolun, ayam poton no seluk tan, inklui mos aifuan, neebe la tama iha menu merenda eskolar.
Jornalista: Jacinta Sequeira
Editora: Domingas Gomes
