DILI, STLTIMORLESTE.com – Ministeriu Edukasaun (ME) kestiona iha eskola balun neebe livru nee rai deit iha biblioteka, tanba bainhira loke livru hirak nee belit malu, tanba kauza rai deit iha tinan barak nia laran.
“Buat ida tan hau hakarak hameno dala barak hau koalia, maibe Diretor barak mak la halo nafatin iha sala ida dala barak dehan biblioteka, maibe biblioteka nee maioria hanesan armajen ida mak arma livru. Kuandu ita ba vizita dehan, ami nian biblioteka mak nee no hau husu labarik sira impresta livru ka lae, dehan lori ba uma, labarik sira estraga livru. Ida nee mak liafuan husi Diretor, Adjuntu no Profesor sira katak, ami labele fahe livru, tanba estudantes sira sempre estraga livru,” afirma Ministra Edukasaun (ME), Dulce de Jesus Soares ba jornalista sira iha salaun Ian Martin Balide, Tersa (23/09/2025).
Nia dehan, kuandu tama ba iha sala biblioteka nee livru hirak nee loke ba belit malu, tanba tinan barak la book. Profesor sira bele fahe livru sira nee ba estudantes sira no bele halo lista. Labele rai deit livru nee iha biblioteka, tanba livrus hirak nee rai kleur ona, bainhira loke belit malu hela.
Iha parte seluk Adilson Viegas Esperito Santos hanesan ofisiais biblioteka iha Eskola Sekundariu Jeral Finantil dehan, sekuandu livrus sira nee estudantes sira impresta loron tolu sira impresta livru ida, no loron tolu sira tenke entrega fali livrus nee mai iha eskola.
Fatin nee mak ladun sufisiente ba estudantes sira, tanba kada loron atende estudantes tolu nolu nunee, nee presiza espasu neebe luan para estudantes sira bele book aan diak.
Jornalista: Jacinta Sequeira
Editora: Domingas Gomes
