BAUKAU, STLTIMORLESTE.com – Loron 25 Setembru 2025 (aban) iha Parlamentu Nasional sei koalia asuntu Lei Pensaun Vitalisia (LPV) nunee lei nee la halakon, joven rezistensia sei apoiu manifestante sira nia planu ba asaun tuir mai inklui povu mos sei tun, tanba Primeiru Ministru rasik aseita halakon LPV.
Koordenador OPJLATIL iha Ponta Leste, Hélder Guterres da Silva “Laran Toos” agradese ba manifestante sira neebe realiza manifestasaun hasoru Parlamentu Nasional kona-ba sosa kareta foun no pensaun vitalisia hatudu duni maturidade, tanba Parlamentu Nasional rasik foti desizaun kansela sosa karreta foun no halakon pensaun vitalisia ba deputadu sira.
“Ba ami joven rezistensia nia hanoin nee diak tebes atu nunee bele halikan ba fali fatin seluk, labele habokur ema kiik oan ida la dun fo benefisiu ba nasaun no sentimentu povu kiik sira nian,” hateten Laran Toos iha Vila Nova, Baukau, Kuarta (24/09/2025).
Tuir joven rezistensia nee katak, sosa karreta foun no pensaun vitalisia la merese atu implementa, tanba habokur deit parte balun hanesan deputadu sira, maibe povu kiik iha baze kontinua infrenta problema infraestrutura bazika sira, tanba nee orsamentu neebe aprova sosa kareta no orsamentu ba pensaun vitalisia nian aloka fali ba asuntu seluk hodi fo benefisiu ba povu.
Nia sublina, loron 25 Setembru 2025 mak Parlamentu Nasional sei tetu ezijensia manifestante sira nian kona-ba halakon pensaun vitalisia, tanba nee husu atu halakon total.
“Diak liu halakon total bele fo benefisiu ba nasaun no povu. Se deputadu sira mak kreditu nee la fo impaktu, fo impaktu ba pesoal ida-idak nian labele kait ho pensaun vitalisia, nunee konkordansia neebe sira halo ho universitariu sira tenke halo lakon neebe liafuan nee tau ba konsiderasaun, se la halakon manifestasaun sei iha nia tempu ezije nafatin. Apoiu tanba uluk ita mai ho liman mamuk alkansa buat ruma, maibe agora ba oin ita apoiu buat neebe la fo benefisia ba komum,” Laran Toos akresenta.
Jovem Rezistensia nee argumentu, aban deside destinu pensaun vitalisia nian, maibe Parlamentu Nasional la deside atu halakon pensaun vitalisia mak jovem rezistensia sei apoiu manifestante sira, tanba tempu ba manifestante nian sei iha.
Laran Toos deklara joven rezistensia nia apoiu ba manifestante sira bainhira pensaun vitalisia la halakon mak, sei fo apoiu hanoin konstrutivu ba manifestante sira nunee bele hetan solusaun pozitivu.
Iha sorin seluk Prezidente Konselhu Kombatentes Munisipiu Baukau, Fernando “Beredu’u” Gusmão hateten, asuntu pensaun vitalisia Primeiru Ministru Kay Rala Xanana Gusmão rasik deklara no aseita halakon pensaun vitalisia, tanba nee tenke halakon.
“Halakon lei pensaun vitalisia ita nia maun boot Xanana aseita ona tenke halakon, ami ida uluk halo funu 24 anos iha ai-laran toba iha udan laran loron laran tahu laran la hetan buat nee, sira ida tinan 5 tur iha uma udan la kona, kadeira roda sae kareta mak ba tur iha neeba hetan fali pensaun vitalisia nee laloos ida,” katak Beredu’u.
Prezidente nee sublina, halakon lei pensaun vitalisia sei tetu iha loron 25 Setembru 2025, nunee husu deputadu sira afavor hodi halakon pensaun vitalisia, maibe bainhira la afavor no pensaun vitalisia nafatin eziste mak povu sei tun.
“Se aban mak la deside entuan sira kontra ita nia maun boot Xanana entaun povu bele tun, tanba ita nia boot mak nee maibe sira la fiar nee povu tun ona,” Beredu’u komenta.
Veteranu tinan 24 nee argumentu, bainhira Parlamentu Nasional la deside halakon pensaun vitalisia ba deputadu sira hanesan luta nain sei apoiu manifestante sira la direita, maibe fo apoiu moral hodi manifestasaun nafatin eziste too loron termina ho manifestasaun sein violensia hanesan estraga fasilidade estadu.
Beredu’u husu deputadu sira iha loron aban fo afavor hodi halakon pensaun vitalisia, maibe la fo votus afavor husu manifestante sira halo manifestasaun hasoru deputadu no deputada neebe salva pensaun vitalisia.
Jornalista: Tomas Reis
Éditora: Carme Ximenes
One Response
Bila perlu munisipiu hotu organiza malu tun hotu dala Ida,sekarik governu la Rona povo Nia aspirasaun.