OEKUSI, STLTIMORLESTE.com – Familia uma laran labele kona virus HIV, mak tenke uza aimoruk hadomi malu.
Prezidente Instutisaun Nasional Kombate HIV-SIDA (INSIDA), Daniel Marcal hatete, familia labele kona virus HIV, nee tenke uza aimoruk hadomi malu.
“Familia uma laran la kira unidade, la hadomi malu no sempre kria problema iha uma laran, entaun fuan laiha domin ona, no ida nee mak ba liur hodi lori tan moras HIV mai uma laran. Tanba nee atu rezolve HIV nia aimoruk mak hadomi malu deit,” dehan Daniel Marcal ba jornalista sira iha Suku Taiboco, Rejiaun Administrative Espesial Oekusi-Ambeno, Sub-Rejiaun Pante Macassar, Tersa (23/09/2025).
Nia dehan, INCSIDA mai halao sosializasaun iha Suku Taiboco hodi fo hanoin atu nunee hadook aan husi moras HIV-SIDA, tanba nee sai ona feen ho laen tenke hadomi malu, atu nunee prevene moras HIV.
Nia dehan, daudaun nee sidadaun idade 50 too 60 kona moras HIV, tanba dala barak iha uma laiha unidade no familia la saudavel.
“Ita hadia ida iha uma no hadomi ida iha uma nee, ita labele hadia seluk iha liur neeba no hadomi fali seluk iha liur neeba. Ita mai fo hanoin ba malu kona-ba virus HIV, atu nunee feto ida ho mane ida mak hola malu, labele moris hamutuk ho feto liu ida hanesan mos mane, tanba nee moris hamutuk ho feen mak nee ho laen mak nee ona, labele ho ema seluk, hadomi malu,” nia tenik.
Nia esplika, atu halo prevensaun ba moras HIV nee mak Servisu Saude RAEOA hamutuk ho INCSIDA halao teste ran ba komunidade Suku Bobocasse. Horiseik iha Suku Taiboco iha kazu 1, maibe kazu jeral Iha RAEOA hamutuk 95.
“Nee tanba ita nia konsezu, ita nia koalia maka ema senti katak, afinal saude nee iha ita nia liman,sei hau la ba hasai ran hau lahatene nee kona HIV no SIDA bele mate lalais,” nia deklara.
Nia informa, uluk sidadaun sira lakohi teste ran, maibe ho sosializasaun nee sira hakarak teste ran hodi hatene sira nia status HIV.
Iha fatin hanesan, Xefe Suku Taiboco, Mateus Naz hatete, informasaun konaba virus HIV-SIDA nee importante tebes ba populasaun iha Suku Taiboco, tanba nee nudar Xefe agradese tebes ba INCSIDA nia prezensa iha Suku Taiboco.
“Hau hanoin informasaun nee ami nia komunidade presiza rona fulan ida rua bele dala ida, tanba ita hotu hatene katak moras HIV-SIDA nee perigozu ba ita ema nia vida, no nudar laen no nudar fen tenke kria domin iha uma laran atu nunee labele lori virus nee mai uma laran,” nia koalia.
Nunee mos Komunidade Falbiano Salsato, agredese tebes ba INCSIDA neebe mai fahe ona informasaun neebe importante nee komunidade sura, liu-liu ba joven sira atu labele halo relasaun seksual arbiru.
Jornalista: Jeniche da Costa
Editora: Domingas Gomes
