DILI, STLTIMORLESTE.com – Prezidente Republika (PR), Jose Ramos Horta kondekora Primeiru Ministru (PM), Dato Seri Anwar Ibrahim Grande Colar da Ordem Timor Leste, tanba PM apoiu makaas ba Timor Leste.
Iha loron kuarta lokraik (24/09/2025) Prezidente Republika Jose Ramos Horta kondekora Primeiru Ministru Dato Seri Anwar Ibrahim Grande Colar Ordem Timor-Leste, tanba PM apoiu makaas ba Timor Leste.
Prezidente kondekora tuir Dekretu Prezidente Republika numeru 97/2025 hodi kondekora Primeiru Ministru Malzia Dato Seri Anwar Ibrahim, Grande Colar Ordem Timor Leste, no Ordem Timor Leste kria husi dekretu lei numeru 20/2009 iha loron 6 Maiu hodi rekonhese no agradese ba sidadaun nasionais no estranjeirus neebe kontribui signifikativu no benefisiu ba Timor Leste ou umanidade.
Iha biban nee Prezidente Republika hatete, PM Malazia sei sai onra boot, nunee Prezidente kondekora Primeiru Ministru Dato Seri Anwar Ibrahim ho Grande Colar Ordem Timor Leste, nasaun nia onra aas liu.
Kondekorasaun ida nee nuudar rekonhesimentu ba ninia advokasia pesoal no kleur ona ba kauza, no ba Malazia nia papel xave, iha ninia lideransa nia okos, hodi apoia Timor dezenvolvimentu nasional no jornada atu sai membru ASEAN ba dala 11.
Xefe Estadu hatete, Timor Leste sei buka atu hametin kooperasaun iha defeza, seguransa no siber seguransa. No ami sei intensifika konetividade aerea, hodi konsolida marku neebe alkansa ona iha tinan ida nee ho sasemok diretu Batik Air nian entre Kuala Lumpur no Díli.
Hirak nee mak medida konkreta sira atu haklean amizade no hamosu benefísiu tanjível sira ba povu sira.
“Iha nota pesoal, hau iha privilejiu, iha inísiu tinan ida nee, partisipa iha lansamentu ita boot nia livru “Global Justice and Peace Through Dialogue. Ita boot nia mensajen dehan katak fraternidade umana laos ideal abstratu ida, maibe aliserse dame nian iha sintonia klean ho ami nia istoria neebe todan no ami nia kompromisu ba rekonsiliasaun. Ita boot nia liafuan sira fo hanoin mai ami kona-ba líder sira nia knaar atu harii ponte, promove dialogu no kura kanek sira iha fuan. Ida nee maka espíritu neebe ami hanoin atu lori ho ami ba ASEAN no ita nia rejiaun komun,” katak Horta.
Lori povu no governu Timor Leste nia naran, agradese dala ida tan ba Primeiru Ministru nia vizita, vizita amizade no PM Malazia nia apoiu neebe la nakdoko.
“Ami hein bele hasoru fali ita boot iha Kuala Lumpur iha fulan oin mai, iha Simeira istorika neebe ikus mai Timor Leste sei hola nia fatin iha família ASEAN nian,” katak PR Horta.
Prezidente dehan, iha privilejiu atu fo premiu Grande Colar Ordem Timor Leste ba Primeiru Ministru Malazia distinsaun aas liu ba povu no nasaun nian.
Timor Leste sei hanoin nafatin saida mak Vosa Exelensia, no Malazia halo ba Timor Leste liu husi apoiu oin-oin neebe halo ona ba Timor Leste.
“Mai ita foti ita nia kopu ba saúde no ksolok husi Sua Exelensia Primeiru Ministru Anwar Ibrahim, ba amizade neebe metin entre Malazia no Timor Leste, no ba vizaun partilhada kona-ba Sudeste Aziatiku ida neebe pasífiku, prosperu no unidu,” hakotu.
Jornalista: Emerenciana Pinto
Editor: Xisto Mendonça
