DILI, STLTIMORLESTE.com – Primeiru Ministru (PM), Kay Rala Xanana Gusmão hateten, estudante sira bele halao manifestasaun, tanba manifestasaun nee akontese iha nasaun hotu, maibe laos ho asaun violensia, se halo violensia polisia kaer ema neebe halo mak hatan laos ema ida dudu husi kotuk hodi hakilar no tuda nee.
Xefe Governu hatoo kestaun nee ba Jornalista sira, bainhira remata halao enkontru semanal ho Prezidente Republika, iha Palasiu Prezidensial, Nicalau Lobato, Bairru Pite, Dili, Kinta (25/09/2025) hatete, estudante halao manifestasaun nee normal hodi kontra buat balu neebe laloos, maibe protesta ho manetek laos ho violensia.
“Prezidente Republika ho hau ami koalia oituan konaba manifestasoens neebe mosu, manifestasoens nee akontese iha mundu tomak, hau hatene katak imi komu Imprensa imi akompanha mundu liu hau, hau laos imprensa mais tempu iha hau loke tiha televizaun haree manifestasaun iha nee no iha neeba, hodikalan mos hau sei haree manifestasaun iha fatin balun, hodikalan mos hau haree manifestasaun iha Portugal iha fransa, iha neebe neebe ita buka akompanha buka haree, manifestasaun manifestaun mais laos impoin katak imi lahalo tuir ami sunu hotu nee iha Nepal, Nepal oin seluk,” dehan PM, Xanana.
Ho manifestasaun neebe akontese iha raí laran Xefe Governu fo ezemplu hanesan iha Nepal manifestasaun komesa taka tiha internet, Facebook buat hotu taka tanba ema kritika Governu liu husi neeba, tanba rejime iha neeba mos laos rejime demokratiko, tanba nee mak apresia ba de forma jeral Universitariu sira bele hatudu mai inan nno aman neebe terus hela haruka sira ba eskola hatudu komportamentu diak.
“Inan aman neebe terus sira ba eskola tenke hatudu komportamentu diak, bainhira husi kotuk mak dudu ita halo aat halo aat, ida halo kanek ema ruma, estraga buat ruma polisia kaer laos ida dudu ita ba hakilar hakilar tuda no estraga sunu ida nee no ida neeba mak ba, mais ita be halo nee mak ba kadeia, neebe hanorin oituan ba imi neebe estudante neebe povu hein hela bainhira mak imi lori no prepara imi nia matenek para ikus mai imi kaer rai nee lori lao ba fatin neebe diak liu, ami la hatene ukun buat nee lao nunee lao nunee lao sala hela deit dalan, neebe ida nee mak ami koalia,” katak PM, Xanana.
Entretantu iha biban nee mos Primeiru Ministru ho Prezidente Republika, koalia hela kona-ba pensaun viatlisia neebe oras nee dadauk deskuti hela iha Parlamentu Nasional.
“Prezidente ami nain rua hamutuk dehan koa entau koa ba nee defende lei fo ita simu lei lafo ita la simu, nia husu o hetan pensaun veteranu hau dehan hau laos veteranus nia dehan tanba saida o laos veteranus, atu sai veteranus ita tenke hatama surat, mais hau nunka hatama surat husu dehan fo netik sertifikadu hau nuudar veteranus hau laos veteranus ida, hau lembra ba Governu dehan tinan hira ba kotuk ema balun fo tiha medala ba hau pois temi fali nee Soharto hau kaer entrega fali medalha, hau simu medalha nee bolu hau soharto nee deskulpa hela ba imi ba neebe hau laos veteranus,” hatete Xefe Governu.
Estudante sira bele halo manifestasaun hakilar hakilar, tanba Primeiru Ministru mos senti nia aan katak, dadaun nee idade avansadu ona labele moris naruk ona, tanba nee jerasaun agora prepara aan ba deskuti problema iha Universidade, deskute problema estadu nia nunee bele buka atu rejolve, bainhira jerasaun tua laiha ona foinsae sir abele kaer rai nee ba oin ho diak.
“Halakon pensaun nee agora deskuti hela iha Parlamentu hau ohin temi ona katak, hau ho Prezidente ami nain rua koalia tiha ona sira diskute dadaun iha Parlamentu ami nain rua dehan katak halakon laiha problema, ate hau temi tan veteranu nia mos hau la simu tanba hau laos veteranu,” dehan PM, Xanana
Jornalista: Emerenciana Pinto
Editora: Carme Ximenes
