DILI, STLTIMORLESTE.com – Primeiru Ministru (PM), Kay Rala Xanana Gusmão ho Prezidente Republika (PR), Jose Ramos Horta hatoo apresiasaun ba povu no sosiedade Timor Leste (TL), tanba durante vizita Primeiru Ministru Malazia iha TL situasaun lao kontroladu no hakmatek.
Xefe Governu ba jornalista iha Palasiu Prezidensial, Nicolau Lobatox Bairru Pite, Dili, Kinta (25/09/2025) hatoo kongratulasaun ba povu no sosiedade tomak neebe lao hakmatek durante vizita Primeiru Ministru Malazia, Dato Seri Anwar Ibrahim.
“Hasoru malu ho Prezidente no Prezidente husu atu fo apresiasaun boot tebes ba sosiedade tomak Dili laran tomak, no joven sira tanba iha loron rua vizita Primeiru Ministru Malazia Dato Seri mai Timor buat hotu lao kapaas tebes, hodi hatudu katak ita nia estadu de direitu demokratiko lao duni,” katak PM, Xanana.
Ba jornalista sira Primeiru Ministru dehan, tanba saida temi estadu direitu demokratiku tanba ida halo tuir buat nebee demokrasia husu no valores demokratiku, mais kona-ba demokrasia ba moris diak, pas establidade ida nee mak importante tebes.
“Tanba nee mak imi mos kala rona ona iha krize 2005 too 2009 depois koalia no lao Timor tomak husu povu atu komprende povu hasae buat ida, lema foun ida mak adeus konflitu bemvindo dezenvolvimentu, nia hun mak 2005 loro monu lorosae, imi lembra kalae, imi sei kiik hotu imi la lembra ida, jardim iha Hotel Timor, merkadu lama, iha fatin barak nee IDP sira hela iha neeba, too bainhira lao haleu tiha koalia ho povu tomak, katak uluk indonezia oho ita, ita ukun aan tiha ikus ita mak oho malu estraga malu fali hodi hamosu adeus konflitu bemvindo dezenvolvimentu, tanba nee mak ita kaer valor demokratiko dehan katak buat ruma iha koalia ba malu laos tuda kareta laos tuda saida laos sunu ida nee no tolok malu,“ dehan PM, Xanana.
Maibe Xefe Governu dehan, demokrasia hanorin ema atu koalia ba malu hodi hadia buat neebe naksalak laos tuda malu, sunu sasan no tolok malu, se halo asaun baku tolok nee laos demokrasia maibe nee violensia.
Liu liu joven sira neebe agora sai matenek ona hakarak prepara aan ikus mai kaer rai ida nee, no Prezidente mos husu koalia konaba novu jerasaun.
“Sim ohin loron ema hotu hotu dehan nusa Ramos Horta katuas ona, Avo Nana Katuas aat liu ona, kaer nafatin ukun nee inves novu Jerasaun laiha direitu ka? Neebe hau dehan povu mak hili, povu mak hili laos dehan katak ai kuitadu nia kala ohin loron nee nia kala faan hela pisang goren osan laiha be hasae tiha ba Primeiru Ministru para manan Netik osan oituan karik, lae? Povu hili atu kurizi, tanba ita iha prosesu konstrusaun estadu, kuandu halo buat ruma aat povu haree povu dehan o mak kaer fali ba,” hatete Xefe Governu.
Primeiru Ministru konsidera nia aan SMA, estudante universitariu matenek liu nia nunee tenke hatudu ba nia nuudar ema katuas ida, neebe SMA deit hodi aprende valores neebe estudante sira aprende iha universitariu sira.
Jornalista: Emerenciana
Editora: Carme Ximenes
