DILI, STLTIMORLESTE.com – Malazia nia apoiu ba Timor Leste (TL) klean tebes durante konstrusaun estadu no apoiu forsa manutensaun ba pas no estabilidade.
Kestaun nee hatoo husi Prezidente Republika, Jose Ramos Horta liu husi diskursu bainhira Kondekora Primeiru Ministru Malazia nian, iha Palestra Prezidensial 2025 Serie IV, iha Palasiu Prezidensial, Nicolao Lobato, Bairru Pite, Kuarta (24/09/2025).
Liu diskursu Prezidente Republika hatete, kooperasaun bilateral entre Timor-Leste no Malazia nuudar parseria ho aspetu oioin, neebe iha abut klean iha Malazia nia apoiu krítiku durante konstrusaun nasaun Timor-Leste nian.
“Hahu ho kontribuisaun sira Malazia nian iha Forsa Manutensaun ba Pas, no funsionariu publiku sira neebe ajuda estabelese estabilidade lalais, relasaun nee sai maduru ba kolaborasaun neebe metin iha edukasaun, saude, komersiu no seguransa. Foku prinsipal ida nafatin mak Timor-Leste nia adezaun ba ASEAN, ho Malazia fornese apoiu tekniku, diplomatiku, no finanseiru esensial,” dehan PR, Horta.
Prezidente Republika, Jose Ramos Horta kondekora Primeiru Ministru Malazia nian iha Palestra Prezidensial 2025 Serie IV, Iha serimonia ida neebe sublina amizade bilateral neebe klean.
Prezidente Republika, Jose Ramos Horta, kondekora Grande Kolar Orden Timor-Leste nian ba Primeiru-Ministru Malazia, Dato Seri Anwar Ibrahim, durante Palestra Prezidensial 2025 Serie IV iha Palasiu Prezidensial Nicolau Lobato, iha neebe Sua Honoravel hatoo diskursu xave kona-ba “ASEAN no Papel Timor-Leste nian.”
Grande Kolar Orden Timor-Leste mak nasaun nia onra aas liu, neebe fo ba Primeiru-Ministru Malazia nian. tuir Dekretu Prezidente Republika Nu. 97/2025, neebe asina husi Prezidente Jose Ramos-Horta iha loron 15 fulan-setembru tinan 2025.
Primeiru Ministru Malazia, Honoravel Dato Seri Anwar Ibrahim, lori ho nia kareira neebe naruk no distintu iha funsaun publika, akademia, no finansas internasional.
Ninia perkursu polítiku inklui ona papel ministerial xave sira, liuliu nuudar Vise-Primeiru Ministru no Ministru Finansas neebe nia hetan rekonesimentu internasional husi Euromoney no AsiaMoney ba ninia lideransa durante Krize Finanseira Aziatiku 1997 nian.
Figura fundador ida hosi instituisaun islamika no edukasional sira Malazia nian, hanesan Universidade Islamika Internasional Malazia no Movimentu Juventude Musulmanu Malazia nian (ABIM), Dato Anwar nia kareira mos reflete ninia kompromisu forte ba reforma polítika. Nia hetan nomeasaun nuudar Primeiru-Ministru ba dala 10 iha fulan Novembru tinan 2022, tuir nia mandatu nuudar Líder Opozisaun no Prezidente Parti Keadilan Rakyat (PKR).
“Ohin, ita hetan onra laos deit líder ida, maibe belun metin ida Timor-Leste nian. Primeiru-Ministru Dato Seri Anwar Ibrahim nia kompromisu ba ita-nia nasaun nia viajen, no Malazia nia apoiu neebe la hotu—husi esforsu krusial manutensaun pas nian iha tinan 1999 too ita-nia aspirasaun partilada ba adezaun ba ASEAN— exemplifika propriu signifikadu solidariedade nian. Parseria ida- nee, harii iha tempu dezafiante sira, agora sai hanesan pilar fundamental ida ba ita-nia prosperidade no integrasaun rejional iha futuru,” hateten Prezidente Republika, Jose RamosHorta.
Iha nia diskursu prinsipal, Primeiru Ministru Dato Seri Anwar Ibrahim hatoo agradesimentu profunda ba onra nee, neebe nia simu ho haraik-an hodi povu Malazia nia naran. Primeiru Ministru sublina signifikadu istoriku husi Timor-Leste nia adezaun iminente ba ASEAN nuudar membru ba dala 11, marku ida neebe Malazia defende kleur ona.
Timor-Leste nia determinasaun hodi kontinua kompleta prosesu sira ba adezaun ba ASEAN nuudar testemuna ba ninia determinasaun estraordinaria.
“Hau iha konfiansa katak determinasaun hodi kontinua lao ba oin sei permite Timor-Leste atu sai lalais membru xave, proativu ASEAN nian ho knaar ida neebe signifikativu no produtivu. Liu.husi kaer metin ninia prinsípiu estavel iha governasaun no konsolidasaun pas, Timor-Leste bele sai nuudar konselhu moral ida ba rejiaun, enkuantu nia ligasaun sira neebe estabelese ona ho mundu luzofonu no illa sira Pasífiku nian koloka Timor-Leste hanesan ponte uniku ida, neebe bele fasilita avansu estratejiku ba kompromisu rejional sira ASEAN nian neebe luan liu,” afirma husi Primeiru Ministru, Dato Seri Anwar Ibrahim.
Hodi elojia Timor-Leste nia korajen moral neebe moris husi nia istoria luta nian, Primeiru-Ministru husu ba rejiaun atu adota abordajen proativu, aproximasaun interdependente neebe sentradu iha sustentabilidade no inkluzividade. Nia afirma katak susesu ASEAN nian depende ba asaun koletiva iha neebe laiha ema ida mak husik hela iha kotuk.
Diskursu prinsipal Primeiru-Ministru nian no kondekorasaun husi Prezidente Jose Ramos-Horta, testemuna husi konvidadu atus resin, inklui membru Parlamentu sira. Membru governu, Funsionariu Publiku, korpu Diplomatiku, Sosiedade Sivíl, Impreza, Akademiku, Estudante Universitariu sira, Alumni sira husi Malazia, Xina, Japaun no Australia, no mos joven talentu Timoroan sira ba ASEAN, no seluk tan.
Jornalista: Emerenciana Pinto
Editora:Carme Ximenes
