DILI, STLTIMORLESTE.com – Parlamentu Nasional (PN) liu husi plenaria extraordinariu aprova ona ho unanimidade ba projetu lei numeru no 11/VI (3_a) kona-ba revoga pensaun vitalisia ba deputadu no eis titulares dos orgaun soberania no providensias sira seluk, iha faze jeneralidade.
Projetu lei nee aprezenta husi Bankada Partidu Kongresu Nasional Rekunstrusaun Timor (CNRT), Bankada Partidu Demokratiku (PD) nomos Bankada KHUNTO, atu halakon total lei Pensaun Vitalisia ba deputadu no eis titulares orgaun soberania sira.
Bankada Partidu tolu nee aprezenta proposta lei ida ba Meza Parlamentu Nasional husu atu halakon total lei Pensaun Vitalisia nee, tanba hetan ejizensia makaas husi Estudante Universitariu Timor Leste (EUTL) liu husi manifestasaun neebe halao durante loron tolu iha Parlamentu Nasional oin husi loron 15 to 17 Setembru 2025.
“Rezultadu votasaun ba projetu lei numeru 11/VI (3_a) afavor 61 kontra 0 nomos abstensaun 0, neebe projetu lei numeru 11 pasa iha jeneralidade,” hatete Prezidente Parlamentu Nasional, Deputada Maria Fernanda Lay liu husi plenaria extraordinaria, Kinta (25/09/2025).
Deputadu Bankada Partidu FRETILIN, José Da Cruz hatete, Bankada Partidu Kongresu Nasional Rekunstrusaun Timor (CNRT), Bankada Partidu Demokratiku no KHUNTO aprezenta projetu lei atu halakon total lei Pensaun Vitalisia nee tanba odiu ho vingansa.
“Se ita muda lei ohin tanba vingansa aban ema ruma bele muda lei seluk tanba vingansa mos tanba konvinensia,” lamenta Deputadu José da Cruz.
Nia dehan, atu muda lei nee presiza haree didiak, nunee labele fo efeitu ba ema seluk tanba loron seluk ema seluk mos bele halo hanesan nee.
“Sira laos brinkeru maibe lei sira mak baze hodi organiza ema hotu nia moris se ita uza hanesan arma odiu nian mak nasaun tomak sei lakon,” dehan nia.
Nunee mos Deputada Bankada Partidu Kongresu Nasional Rekunstrusaun Timor (CNRT) ,Virgina Ana Belo hateten, Bankada Partidu tolu nee aprezenta projetu lei hodi halakon total lei Pensaun Vitalisia laos ho odiu vingansa, maibe tanba kompromisu partidu nian.
“Proposta lei numeru 11 nee halo tanba ho odiu vingansa, tanba saida mak hau hakarak hatete hanesan nee tanba nu fim maun bot Xanana mos sei hanesan eis titulares,” hatan Deputada Virgina Ana Belo.
Entretantu iha diskusaun nee Bankada FRETILIN ho Partidu Libertasaun Popular (PLP) mos aprezenta projetu lei numeru 10/VI (3.a) kona-ba rejime juridiku seguransa sosial ba titulares orgaun soberania, maibe projetu lei nee la pasa tanba hetan vota kontra husi Bankada CNRT, PD no KHUNTO.
Jornalista: Alberto Menezes
Editora: Carme Xime
