DILI, STLTIMORLESTE.com – Ministeriu Edukasaun (ME) la atribui konsesaun eskolar ba Eskola Sekundariu Nobel da Paz, tanba sira seidauk rezolve problema interna iha sira nian eskola.
Diretor Nasional Ensinu Sekundariu iha ME, Benjamin Gomes da Cruz Fernandes dehan, karik eskola Nobel da Paz tinan oin mos la rezolve sira nian problema interna, ME labele atribui konsesaun ba sira. Nee duni tinan nee eskola refere la hetan konsesaun, tanba sira nian problema la rezolvidu, nee sira nian problema uma laran no Ministeriu labele tau kanoru tohar.
“Konsesaun eskolar neebe mak ita atu atribui tan nee Nobel da Paz mos laiha, tanba nian problema internu seidauk hotu. Nee duni eskola privadu 6 deit mak hetan, públiku 54 no privadu 6, hamutuk 60. Kona-ba Eskola Nobel nian nee, tinan oin ita sei haree lai prosesu nee atribui ba se, mak ami foin bele atribui konsesaun nee ba sira,” dehan Benjamin ba STL, Kinta (25/09/2025).
Benjamin dehan, karik tinan oin mak Eskola Nobel da Paz rezolve sira nian problema, nee husi Ministériu bele atribui ona konsesaun ba sira, maibe bainhira la rezolve nafatin maka eskola refere sei kontinua la hetan konsesaun husi ME.
Iha fatin seluk, Diretor Eskola Sekundariu Nobel da Paz, Jeremias P. de Jesus antes nee hatete, maske Eskola Nobel halo ona karta pedidu ba ME, atu nunee bele hetan subsidiu ida nee. Too ohin loron husi ME seidauk transfere osan ida nee ba sira nian eskola, maibe ida nee kompetensia Ministériu nian katak,bainhira mak atu aloka osan ida nee ba sira nian eskola.
Jornalista: Jacinta Sequeira
Editora: Domingas Gomes
