DÍLI, STLTIMORLESTE.com – Vigáriu Jerál Arquidiocese Díli konvida fiéis sira atu reza, halo konversaun no promove dame, tuir mensajen Nossa Senhora de Fátima.
Konvite ne’e hato’o husi Vigáriu Jerál Arquidiocese Díli, Padre Graciano Santos Barros, iha homilia durante selebrasaun solene procissão Nossa Senhora de Fátima, iha Monumentu Nain Feto, Lecidere, Díli, Tersa (13/10/2026).
Padre Graciano hateten katak, loron 13 Outubru iha signifikadu espesiál ba devosaun Nossa Senhora de Fátima, tanba iha loron hanesan ne’e, iha tinan 1917, akontese aparisaun ikus ba pastorinhos na’in tolu, Lúcia, Francisco no Jacinta, iha Fátima, Portugal.
“Mensajen prinsipál husi Fátima mak orasaun, peniténsia, konversaun no dame,” hateten Padre Graciano.
Nia esplika katak, mensajen ne’e kontinua konvida kristaun hotu-hotu atu reza, halo konversaun no peniténsia, no servisu ba dame.
Tanba ne’e, fiéis sira labele haree mensajen Fátima nian hanesan istória pasadu de’it, maibé tenke simu no aplika iha sira nia moris loro loron.
Padre Graciano subliña katak, orasaun mak dalan ida atu hametin relasaun ho Maromak, tanba liu husi orasaun, fiéis sira bele enfrenta problema no responsabilidade iha família, estudu no servisu ho serenidade, matenek no korajen.
Nia mós esplika katak, konversaun signifika rekoñese sala sira ne’ebé halo, muda hahalok ne’ebé la di’ak no husu Maromak nia perdua. Enkuantu peniténsia ajuda ema atu renunsia egoízmu no hadi’a relasaun ho Maromak no ema seluk.
Iha parte seluk, Padre Graciano hatete katak, dame la’ós de’it signifika ausência husi funu ka konflitu armadu, maibé inklui mós moris iha justisa, respeitu malu no rezolve problema sira ho dalan kreativu, la uza violénsia.
Nia afirma katak, maski Timor-Leste la hasoru funu, iha sosiedade sei iha nafatin problema hanesan ódiu, vingansa, inveja, violénsia doméstika, diskriminasaun, korrupsaun no abuzu podér.
Tanba ne’e, nia konvida fiéis sira atu promove dame liu husi diálogu no rekonsiliasaun, no transforma orasaun ne’ebé dirije ba Nossa Senhora de Fátima sai asaun konkretu atu hari dame iha família, Igreja no sosiedade.
Padre Graciano mós konvida fiéis sira atu entrega sira nia moris, família, Igreja no povu Timor-Leste ba Nossa Senhora de Fátima, liu liu atu intersede ba ema moras, katuas-ferik, ema vulnerável, labarik, joven no família sira ne’ebé hasoru difikuldade.
Nia husu mós fiéis sira atu reza ba autoridade sira, atu hala’o responsabilidade ho matenek, onestidade no espíritu servisu, no ba ema hotu ne’ebé servisu iha área edukasaun, saúde, justisa, seguransa no dezenvolvimentu nasaun nian.
Iha fatin hanesan, sarani Lucia de Sousa hateten katak, nia sente kontente tanba bele partisipa iha procissão no halo devosaun ba Nossa Senhora de Fátima.
Lucia husu Nossa Senhora atu intersede ba Maromak hodi tau matan ba ema hotu, tanba liu husi orasaun no intersesaun Maria nian, fiéis sira bele hakbesik liután ba Jesus Kristu.
Nia mós hateten katak, devosaun ba Nossa Senhora importante iha moris loron-loron, tanba Nossa Senhora husu pastorinhos na’in tolu atu reza terçu loroloron.
Procissão hahú husi Motael
Tuir observasaun iha fatin, procissão solene Nossa Senhora de Fátima hahú husi Igreja Santo António Motael, tuku 16:00 lokraik, no kontinua to’o Monumentu Nain Feto, Lecidere.
Hahú procissão, fiéis sira halo oração iha Igreja Motael, durante dalan, sira reza no kanta kantu relijiozu hodi akompaña imajen Nossa Senhora do Rosário de Fátima no pastorinhos na’in tolu, Lúcia, Francisco no Jacinta.
Procissão ne’e lao ho orden, hahú ho kareta ne’ebé lori krús boot, tuir estandarte no imajen santu sira, grupu terçu, acólitu, estudante, padre no imajen Nossa Senhora de Fátima, ne’ebé akompaña husi fiéis sira.
Partisipante sira inklui padre, madre, grupu relijiozu, estudante, seminarista no komunidade sarani sira. Seguransa durante atividade ne’e hetan apoiu husi PNTL, THS no THM.
Fiéis sira lao ho hakmatek no oração durante procissão, nu’udar manifestasaun públika husi sira-nia fiar no devosaun ba Nossa Senhora de Fátima.
Bainhira imajen Nossa Senhora do Rosário de Fátima to’o iha Monumentu Nain Feto, Lecidere, selebrasaun kontinua ho adorasaun ba Santíssimu Sakramentu.
Selebrasaun ne’e sai oportunidade ba komunidade sarani atu hametin fiar, hafoun devosaun ba Nossa Senhora de Fátima no promove dame, justisa, fraternidade no unidade nasionál iha Timor-Leste.
(joa)
