OEKUSI, STLTIMORLESTE.com – Stok aimoruk Antri Retro Viral (ARV),m atu fo tratamentu ba pasiente HIV-SIDA iha Hospital Referal Oekusi sufisiente.
Tuir Xefe Departementu ba Moras Hadaet no La Hadaet iha Serbisu Saude Rejiaun Administrativa Espesiál Oekusi Ambeno (RAEOA), Domingos Fatubai hatete, tanba kazu infetadu ba virus HIV-SIDA iha Oekusi, daudaun nee rejista ona ema nain 95, tan nee presiza stok ARV hodi halo tratamentu ba pasiénte sira tenki rutina.
“Hau senti konaba ai-moruk ARV nee sufisiénte, bainhira stok menus, husi responsavel programa submete kedas pedidu ba nasional, nunee bele distribui mai saude rejional Oekusi, neebe agora daudaun stok iha hela,” dehan nia ba STL iha Sede Suku Taiboco, Kinta (25/09/2025).
Nia dehan, pasiénte 95 nee maioria hetan akompañamentu husi profisionál saúde ba tratamentu, maibe balu seidauk iha konsiensia hodi koopera ho fasilidade saude no nain-rua mak lakon komunikasaun.
Tuir nia, dadus jeral HIV-SIDA iha Oekusi hamutuk 95, husi numeru nee iha suku Taiboko, liu husi sensibilizasaun rejista kazu ida. Tuir politika implementasaun ba programa nee, durante nee lao tuir protokolu. Neebe husi 95 nee balu halo hela observasaun no balu kumpre halo tratamentu, só ema nain rua deit mak viajén ba mai laiha komunikasaun, no balu laiha konsiensia atu halo tratamentu tanba distansia dook husi fasilidade saude, maibe responsabel saude sira kontinua buka sira hodi koopera.
Tuir nia, ba pasiente HIV-SIDA neebe rejista nain 1 iha suku Taiboko, temporariamente halao hela tratamentu no hetan kontrola másimu husi pesoal saude sira iha Postu Saude Oélkaem.
Entertantu dadus komulativu neebe rejista husi Ministeriu Saude katak, kazu HIV-SIDA husi 2003 too Juñu 2025 hamutuk 2.400 mai husi munisipíu 13 mak hanesan Munisipíu Aileu rejista 16 (0,7%), Ainaro rejista 40 (2%), Atauro rejista 1 (0,04%), Baukau rejista 76 (3%), Bobonaro rejista 126 (5%), Covalima 97 (4%) no Munisipíu Dili mak kaas liu tanba rejista 1.767 (75%).
Nunee mós, Ermera rejista 48 (1,7%), Likisa rejista 32 (1%), Lautem rejista 22 (0,9%), Manatutu rejista 24 (0,9%), Manufahi rejista 32 (0,9%), Oekusi rejista 96 (3,6%) no Vikeke rejista 23 (0,7%).
Jornalista: Jeniche da Costa
Editora: Domingas Gomes
