DILI, STLTIMORLESTE.com – Atu halo promosaun ba iha Juiz sira husi terseira klasse ba iha segunda klasse, no husi segunda klasse ba iha primera klasse, tenke liu husi servisu inspetoria.
“Hau haree Juiz balu iha kapasidade, maibe atu hare Juiz sira atu iha kapasidade ka lae ida nee liu husi servisu Inseptoria nian, no servisu inspetoria nian maka halao avaliasaun, halo inspesaun ba sira nia prestasaun servisu, husi nee maka foin haree Juiz neebe bem kualifikadu ka lae,” dehan Jurista Sergio Dias ba STL, iha Kaikoli, Dili, Kinta (25/09/2025).
Nia hatutan, Juiz neebe bem kualifikadu bele promove iha triseira klasse bele promove ba iha segunda klasse no husi segunda klasse bele promove ba iha primera klasse, tanba nee liu husi Inspetoria maka foin hatene Juiz nee iha kapasidade ka lae.
Maibe oportunidade diak atu halo promosaun ba Juiz sira, tanba Juiz balu iha tempu naruk nia laran la sujeita ba inspesaun.
No liu husi inspesaun maka foin hatene Juiz sira nia kapasidade atu bele hasai sira nia kareira ka lae.
Iha fatin ketak, Membru Konselhu Superior Majistradu Judisial, Alexandre Corte Real dehan, tempu ona atu halo promosaun ba iha Juiz sira.
“Tempu ona atu halo promosaun ba iha Juiz sira, tanba Juiz balu servisu ho tinan naruk maibe seidauk iha promosaun ba sira nia kareira, “dehan nia.
Aleinde nee, Prezidente Tribunal Rekursu, Afonso Carmona dehan, promosaun ba iha Juiz sira tenke liu husi inspesaun neebe Inspetor halo.
“Promosaun tenke liu husi inspesaun neebe Inspektor sira halo, Inspetor foin mai tanba nee halo despaisu hodi halo inspesaun ba Juiz sira nia prosesu lao hela, “dehan Prezidente Tribunal Rekursu, Afonso.
Tuir PTR, despaisu iha Juiz nain hitu maka sei halo avaliasaun husi segunda klasse ba iha primera klasse, no sira terseira klasse ba iha segunda klasse Inspetor ida uluk halo tiha ona tanba nee sei haree hotu nia rezultadu.
Jornalista: Terezinha De Deus
Editora: Carme Ximenes
