DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial JF, tanba komete krimi hasoru lezada inisial MJ.
Iha sala julgamentu laran, Juiz prosesu Jose Quintao deklara katak, krime neebe imputa ba iha arguidu, ho natureza semi publiku, signifika katak lei fo dalan liu husi tentativa konsiliasaun entre parte nain rua, liu liu ba iha lezada neebe hanesan vitima, se diak malu ona aseita bele dada fila fali.
Juiza nee esplika se lezada aseita prosesu nee dada fila fali, maibe ho nia kondisaun ruma, katak ba futuru arguidu la halo tan krime hanesan hasoru lezada ka ema seluk.
Iha tentativa konsiliasaun nee lezada neebe hanesan vitima deside atu dada fila prosesu nee, tanba lezada no arguidu diak malu ona.
Ho nunee Tribunal konfirma ba iha arguidu, no arguidu mos aseita, no hamrik kaer liman no husu deskulpa ba iha lezada.
Juiz prosesu mos fo advertensia ba arguidu katak, ba oin labele halo tan aktu hanesan nee, se halo nafatin aktu nee sei iha kastigu seluk maka arguidu sei hetan.
Tanba nee Ministeriu Publiku no Defeza husu ba iha Tribunal atu homologa prosesu nee, no Juiz prosesu deside homologa prosesu refere, no absolve arguidu husi instansia.
Prosesu nee prezide husi Juiz Jose Quintao, MP reprezenta husi Prokurador Hernani Rangel, arguidu hetan asistensia legal husi Defensor Publiku nain ida.
Tuir faktus neeba antes nee akontesr katak, iha loron 24 de Janeiru de 2025, iha oras 20h30 kalan, iha Komoro, Dili, momentu neeba arguidu mensajen ba nia ferik oan hodi fo hatene ba lezada katak, atu ba foti lesada nia Lap Top iha arguidu nia uma.
Bainhira lezada too iha arguidu nia uma, atu foti Lap Top, maibe arguidu husu fali osan US$ 20.00 ba lesada katak, lesada maka deve nia osan.
Tanba deit arguidu husu osan ba lesada, nunee entre sira nain rua komesa diskute malu ona hafoin arguidu mos insulta lesada, too ikus mai arguidu uja ain hodi tebe kona dala ida iha lesada kidan kauza moras no dada is mos ladiak.
Motivu husi problema nee, tanba entre lesada ho arguidu sisi malu osan neebe maka lesada deve ho montante US$. 20,00.
Konsekuensia husi arguidu nia hahalok nee maka halo lezada sinte moras, iha kidan tanba hetan tebe ho ain husi arguidu.
Arguidu, halo ho forma livre, deliberada no konsiente, hatene momos (ben sabendo) katak, uza ain hodi tebe bele halo moras, maibe arguidu halo nafatin nia hahalok nee, hanesan meius ou instrumentu ida neebe mak apto no adekuada.
Arguidu mos hatene hela katak, hahalok sira nee proibidu tuir lei penal. Tanba nee konstitui arguidu JFFL, hanesan autoria material ba pratika krime, ida, ofensas ba integridade fisika simples, tuir artigu 145.
Jornalista: Terezinha De Deus
Editora: Carme Ximenes
