DILI, STLTIMORLESTE.com – Eventu Dili Internasional Maratona ho tema “Halai ba Palestina” sei halao iha loron 11 Outubru tinan nee. Atividade nee Timor Leste hatudu solidaeridade ba vitima iha Gaza.
Lia hirak nee hatoo husi Ministru Juventude Desportu, Arte no Kultura (MJDAK), Nelio Isaac ba jornalista sira, bainhira remata relata preparasaun eventu Dili Internasional Maratona ba Prezidente Republika Jose Ramos Horta, iha Palasiu Prezidensial Nicolau Lobato, Bairo Pite, Kinta (25/09/2025).
“Ohin ami iha atividade ida ho Prezidente Republika, hanesan ita boot sira hatene katak Prezidente iha inisiativa programa ida neebe feitu ona planeadu atu realiza Dili Internasional Maratona, Dili Internasional Maratona sei akontese iha 11 Outubru, antes too dia 11 Outubru sei iha atividade balun neebe sei halo iha neeba. No Dili Internasional Maratona nee iha tema ida prinsipal mak Halai ba Palestina, halai ba Palestina ita hakarak Timor hatudu solidariedade ba vitima sira iha Gaza, oras nee daudaun ita fo mensajen katak, buat hotu-hotu problema iha mundu diak liu ita promove dialogu duke uza forsa halo ema barak sai vitima, tuir esperiensia neebe ita iha,” dehan Ministru.
Ministru hatete, kona-ba Dili Internasional Maratona iha mos ambitu Timor Leste adere ba ASEAN iha fulan Outubru 2025 nia laran, sei iha mos atividade barak neebe ba iha ASEAN, tanba tama ASEAN akontese iha dia 26 Outubru, hahu kedas inisiu Outubru hahu atividade balun ba iha neeba.
Ida nee mos hanesan objetivu prinsipal husi planu Prezidente Republika nia ba eventu sira importante neebe lao iha Timor Leste.
“Neste momentu ohin ami update ba Prezidente sobre preparasaun neebe atu lao too iha neeba ita sei uza loron 3 ba iha preparasaun ou eventu nee husi dia 9-11 Outubru, sei iha programa kulturais espozisaun iha Palasiu Prezidensial, sponsor sira neebe apoiu atividade nee mos sei halao sira nia pameran ba produtu sira nia iha nee, entaun fatin ida nee komesa iha dia 9 Outubru kalan sei iha divertimentu muzika, nunee mos iha dia 10 Outubru hanesan hotu,” dehan Ministru.
Ministru hatutan, iha mos tein husi nasaun ASEAN sira, nomos ASEAN Flash Japaun, Korea no sira seluk, tein nee ho nia objetivu ba pas nia, eventu nee sei iha atividade kulturais no iha mos pameran oin-oin, promosaun saude, desportu tradisional hodi promove turizmu nia nomos atividade lubuk seluk tan neebe sei halo iha dia 9-11 Outubru no iha dia 11 Outubru mak hahu halai taru, komesa dader tuku 5.
“Halai ida nee ba ema sira neebe rejista hotu ona, tempu agora sei loke hela, se mak hakarak ba rejistu online, rejistu mos manual iha federasaun Altetizmu, rejistu iha neeba Full Marathon, mea Marathon Paralimpiku ho halai taru saudavel 3 kilometru, rote sira nee iha nee hotu komesa husi Palasiu Prezidensial finish mos iha Palasiu Prezidensial, “ dehan Ministru.
Nelio mos avizu ba komunidade hotu-hotu iha kapital Dili katak, hahu iha dia 11 Outubru komesa dader too meudia sei perturbu movimentu transporte, tanba nee fo hatene antes katak dia 11 Outubru karik atu halo viajen ruma atensaun nunee evita movimentu.
Nia hatutan, komisaun ba Dili Internasional Maratona kompostu husi ministeriu lubuk ida, konvida ona mos atleta lubuk ida husi liur liu husi karta, maibe too agora seidauk iha konfirmasaun, balun iha ona konfirmasaun, balun seidauk iha resposta, maibe atleta husi Indonezia iha parte Timor Osidental mak konfirma sira mai, nomos ema estranjeiru neebe hela iha Timor, kuaze hotu-hotu rejista atu partisipa halai iha neeba, no atleta paralimpic rejista hotu ona no atleta full maratona rejista ona.
Atleta neebe daudaun nee rejista ona husi Full Maratona iha 31 atleta, husi sidadaun nasional nomos sidadaun estranjeiru neebe hela iha Timor, maibe la taka dalan sei loke nafatin rejistu, no mea maratona iha ona 49 atleta, Paralimpic kuaze 40 husi defisiensia, nomos iha 3 kilometrus nee 630 neebe rejista ona, maibe loke dalan nafatin, se mak hakarak bele rejistu.
“Ita fo hadia ba klase sira neebe atu halai nee mos diak, ezemplu full maratona juara 1 US$ 4000, juara 2 US$ 3000 no mea maratona mos hanesan, no defisiensia nia karik juara 1 US$ 2000, no sira neebe partisipa la juara sei hetan medalha no sertifikadu,” katak nia.
Nia hatutan, orsamentu hotu-hotu mai husi Prezidente Republika ho montante rihun US$ 175 atu realiza eventu nee, ministeriu sira nee hanesan ekipa tekniku atu fo susesu ba eventu nee.
Jornalista: Emerenciana Pinto
Editor: Xisto Mendonça
