DILI, STLTIMORLESTE.com – Ministeriu Edukasaun (ME) fiar katak bolsa kandidatu profesores tinan 2024 hamutuk 187 neebe ohin simu ona tomada de pose sei halao sira knaar ho profesionalizmu no dedikasaun masimu.
Serimonia tomada de pose ba bolsa kandidatu profesores tinan 2024 hamutuk 187 nee halao husi ME ho Komisaun Funsaun Publiku (KFP), iha salaun Ian Martin Balide, Segunda (29/09/2025).
Sekretariu Estadu Ensinu Sekundáriu Jeral no Ensinu Sekundáriu Tekniku Vokasional, Domingos Lopes Lemos dehan, ME fiar katak, bolsa kandidatu sira sei halao knar ho professionalizmu no dedikasaun masimu.
“Ami iha nee atu apoiu ita nian viazen, no ami sei servisu hamutuk atu kria ambiente aprendizajen ida neebe propisia ba kresementu dezenvolvimentu husi ita nian estudantes hotu-hotu. Hakarak fo hanoin ba ita boot sira, edukasaun laos deit konaba transmite konhesementu, maibe mos konaba inspira labarik sira, no foin sae sira atu sai aprendiz durante sira nia moris tomak. Ita iha oportunidade atu halo diferensia iha vida estudantes ida-idak neebe tama iha ita nia klase,”dehan nia.
Nia akresenta, tomada de pose ba kareira dosente ida nee espesiál, neebe reprejenta kapitulu foun ida iha vida professional no avansu promisor ba dezenvolvimentu edukasaun iha ensinu baziku ida nee. Momentu selebrasaun ida nee mak rekonhesementu husi ME ba professor sira neebe mai hamutuk ona iha sistema ensinu nian. Nee posibilidade importante tebes, tanba marka kontinuasaun ba kareira professor neebe dedika ona.
“Ami kontenti ho prezensa husi Prezidente KFP iha seremonia ida nee, marka tomada de pose ba professores nain 187 rekrutadu husi kinta faze bolsa kandidatu ensinu baziku, neebe remata formasaun preparatoria iha Infordepe semana kotuk. Momentu neebe iha importansia signifikativu ba progresu edukasional iha ita nian eskola sira,” tenik nia.
Nia hatutan, hanesan professor iha responsabilidade atu forma ema nia hanoin, inspira ema nia laran no potensial ilimitadu husi estudantes ida-idak. Professor sira iha responsabilidade kria ambiente aprendizajen ida neebe seguru, inkluzivu no estimulante neebe respeitu malu no dejezu ba koinesementu ida diak liu no sai boot iha estudantes sira.
Iha fatin hanesan Komisáriu KFP, José Telo Soares Cristovão haktuir, husu professor sira atu hanorin estudantes ho diak, sai ema neebe professional no responsabilidade ho didika aan tomak, hodi hanorin estudantes sira, eduka estudantes sira ho diak liu tan.
Jornalista: Jacinta Sequeira
Editora: Domingas Gomes
