DILI, STLTIMORLESTE.com – Bainhira iha indikasaun kona-ba relatóriu ruma, Inspetor Eskolar iha Munisipiu Manatuto sei halo inspesaun konjunta ba eskola sira.
Lia hirak nee hatoo husi Diretor Servisu Edukasaun Munisipiu Manatuto, Patricio da Cruz Quintao ba STL via telefone, Segunda (29/09/2025).
Nia hatete, inspetor sira nee, kuandu halo komparasaun ho uluk, sira ida agora nee rutin liu.
“Uluk nee ita bele dehan iha postu balun sira laiha, maibe agora nee ita iha inspector 10. Neebe sira ida-idak fahe sira nian area kontrolu, alende sira monitorizasaun individual kada postu, maibe sira mos halo monitorizasaun konjunta,” dehan nia.
Patricio hatete, inspetor sira halo inspesaun nee ba atividades prosesu aprendizajen, prezensa professor sira, merenda escolar no konsesaun eskolar. Nee duni inspetor sira halo kontrolu ba asuntu hirak neebe ohin mensiona.
“Iha asuntu balun neebe ezemplu karik iha indikasaun konaba relatóriu ruma, nee bai-bain ita nian inspektor sira halo inspesaun konjunta sira halo iha semana kotuk, neebe sira halo inspesaun konjunta iha eskola sira,” nia informa.
Nia hatutan, agora daudaun Inspetor Eskolar iha Munisípiu Manatuto hamutuk nain 10, husi numeru nee nain 2 Pre Eskolar, Ensinu Baziku nain 7, Ensinu Sekundariu Jeral nain 1.
Jornalista: Jacinta Sequeira
Editora: Domingas Gomes
